白鴿黨前主席李柱銘成日反二十三條，又大聲批評中國唔夠民主，不過咁唔代表佢唔愛國喎！
話說前兩日，部份立法會議員同東區區議會議員交流，有區議員批評𠵱家有啲學校有升國旗，有啲就冇，非常混亂，要求立會正視吓。
蔡素玉馬上有反應，舉手發言話要將事情提上立法會法律事務委員會傾。點知有個人忽然舉手，話使乜咁麻煩吖，呢個問題容乜易達成共識，搵八黨聯盟傾就得啦！佢重話全世界嘅學校都掛國旗，點解香港唔掛噃？
發言者係邊個？八方話大家一定估都估唔到，呢個人……竟然係被視為最反共嘅馬丁李！連佢都咁講，蔡素玉就大可放心。
講開馬丁嘅香港情、中國心，原來由來已久，八三年佢同十幾位本港青年才俊組團，前往北京為領導人解說香港信心危機，團員包括已過身嘅張鑑泉及郭志匡，其餘人好似李鵬飛、周梁淑儀、何承天等約埋馬丁，前晚喺馬會reunion。
老朋友會面當然好感慨，大家都不再年輕，各為其主，各走各路。馬丁當晚重幽咗港人一默，話今日港人嘅心情同二十年前一樣冇變─對前景冇信心。八方但願呢樣嘢唔會五十年不變啦！
傳真︰2623-9278
電郵︰