上個禮拜三，伏勝出席流動電訊網絡（8266）上市推介會，雖然喺「非典肺」陰影籠罩下，但出席嘅人數一啲唔少，點解隻股仔咁有號召力？原來佢嘅股東陣容夠鼎盛，除愛達利網絡（8033）之外，就連和黃（013）旗下機構都係佢哋嘅股東之列。
時下香港人所用嘅手機短訊SMS同MMS，都係靠佢哋設計嘅平台嚟傳送，根據招股書所講，除咗香港6大流動電訊商係佢哋嘅客之外，聯通（762）同Singtel都係佢哋嘅客，計埋台灣兩大電訊商呢兩個大客，照咁睇，亞太區嘅SMS同MMS肯定係佢哋嘅天下。
據說由於隻股太搶手，喺星期五嗰日收盤時，已經唔夠貨，今次有份「入飛」嘅大戶話隻股應該要升到4毫子樓上先叫做合理，以配股價3毫子計，即係話有三成幾升幅，都咪話唔和味。
之前公布過同IBM合作研製中文處理器嘅文化傳訊（343），終於喺上星期五宣布推出中文處理器，據說佢哋已經收到唔少定單。不過隻股上星期五已經升咗7個巴仙，升得咁急可能要唞一唞氣先會再衝過，大家不妨留意吓，喺低位買番啲。
另一隻之前走勢幾好嘅意科（943），較早時有個大戶出貨，曾經一度跌番落去2毫半水平，不過由於其他大戶仍然唔肯離場，而且收貨一啲都冇手軟，上個禮拜五已經高收番喺0.275元。
聽行家話，意科公布同深業物流合作後，合營公司已經搵到首個海外大客，聽講重係好有名氣，𠵱家只係爭個客擇日簽約。如果俾佢哋做到呢單生意，淨係收錢都收到手軟。
伏勝