香港嘅Cookies成立咗咁耐，如今都要分拆做MiniCookies，身為佢哋「前輩」嘅晨女Morning娘，近排亦成日俾人話聲勢大不如前，計我羅拉話，如果晨女真係要斬件，我最推薦同樣係十五歲嘅孖寶 希美同加護亞依，一齊出嚟組隊未成年版Tatu或者細路版雙星報喜，因為佢兩個嘅可塑性係最高！
我羅拉之所以咁鍾意睇晨女主持嘅《Hello！Morning》節目，全因為希美同亞依次次一定會孖住上，諗啲好爆笑嘅橋段出嚟，好似前日嗰集咁，佢兩個就變咗做鬍鬚乒乓球員，除咗搶晒其他師姊妹嘅鏡之外，大人細路都睇得鬼咁開心。
呢對孖寶趁住個勢起，最近孭飛出咗本寫真集《 加護》，裏面十六個造型，當中當然有例牌Tatu式纏綿照啦，但最好睇嘅都係佢哋扮罰留堂同埋當街做人肉足球嘅兩個look，希美同亞依無論係衣着同髮型都一模一樣，重要連楚楚可憐嘅神情都似到十足，話佢哋係失散咗嘅孖生姊妹，肯定大把人信。