今日係五四運動八十四年紀念，以往都有人搞活動紀念吓，五四係北京大學生發動嘅，但今日北京全部學校停課，基本上封咗城，香港冇乜人會記得五四，讓它靜靜地過去便是。
大好假期，如果因為沙士而困在家中，實在沉悶，去邊度好呢？到市區商場，恐怕已經恢復人頭湧湧，空氣不佳；上星期建築邦揸車與家人去郊遊，由西貢去到新娘潭，到處插針不入，最後走入雙魚河馬會飲下午茶，點知連車位都冇，入面好似趁墟，問吓啲夥計，原來沙士爆發之後，本來幾靜局，少客到嘅雙魚河會所即刻塞滿人，會員話空氣好，夠乾淨喎。沙田馬會中菜廳亦係好好生意，與沙田區酒店、酒樓嗰種靜局狀態相比，馬會簡直羨煞飲食界。
唔止馬會如此，南區會所亦然。公子L一家人好耐冇去過深水灣高爾夫球會，假期特登入去走一轉，發覺空櫈都搵唔到半張，中西餐廳都坐滿人。公子L說：「呢度嘅中西餐點樣好食法，你大概都知一二，平時莫講周日，即使係黃金假期，都唔會爆，點知沙士一嚟，立即滿座。」
南區噃，高球會噃，一聽就知高級，好似有晒清潔衞生嘅保證，理得佢食物水準如何。有錢人家被迫灣水，唔可以周圍飛，留響香港唔敢去富豪飯堂消費，自不然去晒郊外高級會所食飯消費，《蘋果》第一才子筆下：「駭人的春瘟趕走了中環古樓上的官紳名流，也嚇跑了鮑魚食府的貴客望族。」原因好簡單，呢批人走晒去會所。