江華和楊婉儀等昨日為明晚推出的無綫新劇《繾綣仙凡間》宣傳，江華表示太太麥潔文下月將推出十一年來首張唱片，他十分支持。唱片中，麥潔文會與江華合唱《分分鐘需要你》，還收錄一首撰寫江華的歌曲，以示夫婦十分恩愛，互相扶持。
江華、黃卓玲和楊婉儀等昨日在西環北京同仁堂分店，宣傳明晚首播的無綫新劇《繾綣仙凡間》，眾演員更齊齊學執藥，執了一服抗炎藥。
江華表示太太麥潔文下月將推出唱片，他說：「佢都十一年冇出過唱片，我身為丈夫梗係支持佢，我哋重會喺隻碟合唱《分分鐘需要你》，另外重有一首歌係寫我。」下周日（十一日）是母親節，江華會怎樣跟母親和太太慶祝，他說：「其實日日都係母親節，我會同阿媽食飯，呢啲嘢平時都會做，而囝囝就會畫畫畀媽咪，佢（指麥潔文）每年都會儲起呢啲禮物，當做紀念。」
與麥潔文結婚已十一年，江華日常都會向太太說綿綿情話，江華說：「呢啲說話全部係自然流露，我會用國語同佢講『親愛的』，我唔覺得痹，愛一個人係咁，愛係要講出嚟，做人要開放啲，感情係咁維繫，冇嘢係應份，大家好客氣，大家經歷好多嘢，要珍惜眼前嘅嘢，我個心擁有好多嘢更富裕。」
此外，新婚不久的楊婉儀昨日完成宣傳，跟眾演員往附近午膳，其丈夫王瑞勳就親自做柴可夫到來接送。楊婉儀說：「我好少食中藥，舊年食過一劑，但我飲咗一半就飲唔落去，好難飲。我同老公𠵱家食緊用中藥提煉嘅藥丸，比較易入口，每日要食三樽，啲藥細細樽嘅。」問到楊婉儀可有造人大計？她說：「𠵱家肺炎咁犀利，我都未有生BB嘅計劃。」
採訪：王崇穎
攝影：甄朝健
