仁濟前主席陳耀星的長子陳湛文與拍拖三年半的女友黃妙卿，昨日在中環大會堂註冊結婚。儀式完結後，雙方家長及親友移師美國會午膳，婚宴則定於下周五（九日）在灣仔君悅酒店舉行。
問新郎哥陳湛文如何結識嬌妻？他說：「我哋呢段可以話係『黃頁』情緣，因為太太係做廣告嘅，有日佢揭黃頁搵客，咁啱就搵正我哋公司。當日我負責接見佢，就係咁開始咗，對我嚟講，黃頁唔止可以幫我搵到生意夥伴，重幫我搵埋人生嘅另一半㖭。」
陳湛文表示現與家人同住於九龍塘大宅，由於他住慣大宅，加上非典型肺炎肆虐，不急於覓新居。談到度蜜月，陳湛文說：「我哋會去地中海，但係會延至九月，等非典型肺炎過咗先，費事𠵱家去到嗰邊俾人歧視啦。」
採訪：DebbieLum
攝影：JerryYan
