「郵差」馬龍嘅老拍檔史托頓噚日話要退休，換言之爵士兩老將成絕響！不過今年三十九歲嘅馬龍揚言自己寶刀未老，起碼重可以打多兩、三年。由於佢同爵士班主關係惡化，下季十成九都會過檔另一隊搵食。
「郵差」已話明不惜大降身價，最緊要嘅係喺退休前攞番隻冠軍指環，所以佢𠵱家最想過檔嘅球隊就係西岸四雄：帝王、馬刺、小馬及湖人，其中湖人同馬刺就係佢嘅首選。點解？首先講湖人，湖人𠵱家最唔掂嘅就係大前鋒，有咗「郵差」幫手，加埋「孖寶」奧尼爾同高比仔撐住，湖人真係想唔捧盃都幾難囉！
至於馬刺，由於大衞羅賓遜今季退休，馬刺最需要一個大嚿佬頂住中門，馬龍就最適合不過啦！到時佢同鄧肯組成嘅「新雙塔」，絕對有能力同其他西岸列強鍊過。
雖然我求大俠為大家報料嘅時候，重未知道今季英超最後邊隊要降班（可能已經係韋斯咸！），不過今晚作客阿仙奴嘅列斯，就點都會搏命。事關佢哋季前賣李奧費迪南畀曼聯，合約寫明若曼聯贏聯賽冠軍，就要再畀多七十五萬鎊轉會費，所以列斯一定會搏晒老命！
英國女球迷美雪係曼聯中場球星碧咸嘅超級「番士」，於是搵人幫佢將碧咸個名（Beckham）紋喺後腰，但唔知係佢寫得太潦草抑或紋身師睇錯咗，竟然紋咗Beckam，佢嬲到爆，重話唔排除採取法律行動。咁又係嘅，碧咸咁出名，嗰紋身師都整錯，今次真係大整蠱！
下屆歐冠盃決賽會喺史浩克04嘅史浩克球場踢，史浩克原希望可以踢下屆歐冠盃，但𠵱家應該冇行；於是佢哋就退而求其次，想執埋個歐洲足協盃參加資格補數。你知啦，如果佢哋玩唔到歐洲賽，唔見錢事少，冇「飛士」事大，所以呢場作客羅斯托克，一定搏命去攞呢三分！
法蘭迪保亞講到明，如果要等到巴塞隆拿喺六月選完新會長後先至同佢傾合約，佢就話早走早着，甚至話如果可以即刻走重好。但我求大俠認為，巴塞正係力爭上游，禮拜日要喺客軍華歷簡奴身上搶分，佢講啲咁嘅嘢，操守真係有問題，唔抵幫。
球迷一向都知紐卡素出產唔少壞孩子，法國仔班納最近又可能出事。佢涉嫌同另外兩個後生仔，性侵犯一個十六歲未成年少女，單嘢重有下文，如果入罪都幾大鑊。我求大俠相信今次真係激死老領隊卜比笠臣，因為𠵱家正係全隊爭取來屆歐冠盃關鍵時刻，重搞啲咁嘢，真係多得班納唔少。