杜德偉（Alex）因去年底涉嫌藏毒被捕，加上女友周汶錡緋聞纏身，令他一下子成為記者追訪對象。Alex首次詳談對兩件事的感受，他視官非是上天給他的功課，還可以借此更了解自己及身邊的人；而女友的緋聞，則使他倆感情大增。面對逆境，Alex儼如魔術師一樣，將壞事變成好事。
杜德偉去年聖誕節在跑馬地被警方拘捕，落案起訴他涉嫌藏有手捲大麻煙，案件現排期至下月十七日再審，因案件未判決，故Alex一直保持低調。他日前接受訪問時，坦言即使有壞事發生，都要向好的方面去想，影響才會正面。
Alex說：「發生咁嘅事，唔開心一定有，但我知幾時會解決到同有邊啲人幫到我。雖然𠵱家單嘢拖長嚟搞，真係好煩，就當係磨練囉，始終會有解決嘅一日，無謂自己一路揹住喺膊頭度咁重。一個人成長，一定會遇到好多沙石，可能我今次踢着嚿難踢啲嘅大石頭，或者過到呢關我就升班呢！希望神下次畀其他功課我時，唔好咁難，希望係快樂啲嘅功課。」
Alex謂不去想不代表逃避或不在意，只是事件既已發生，便要接受，將影響減到最低，他說：「每件事發生都有好有唔好，今次我發現有好多朋友好關心我，我又了解自己多一啲，以前以為呢啲事發生喺自己身上，就實死啦，點知我都捱得過。開始時梗係騰雞，惟有將所有理智攞晒出嚟，個人唔好亂先。做人要用七分樂觀加埋三分幽默，咁日子會過得香甜啲。希望咁講出嚟，可以幫到遇到困難嘅人，生命中有啲問題發生咗就不如睇開啲啦。」
Alex也慶幸自己有對開明的父母，他說：「我爸爸媽媽好好，佢哋知如果問太多，或者俾我覺得佢哋好擔心，咁我又會重擔心，佢哋唔想加重我負擔，唔問咁多，應問先問。親情真係好珍貴，唔係發生呢件事，我未必咁真切體會到。」
問Alex有否作最壞打算，他說：「件事（官司）一日未了，好多詳細嘅嘢我都唔講得，我當然知到最壞或者最好嘅結果會係乜，但唔代表我諗咗最壞打算係點而放棄，或者最壞情況其實係冇乜嘢，就當冇事，我唔會因為呢件事放棄對工作嘅期望同態度。無論結果係正面或負面，我都會做好自己，咁係我答謝家人同對我好嘅人嘅方法。」
