杜德偉與名模周汶錡（Cathy）相戀五年，早前Cathy被傳與某上海富商過從甚密，但Alex一於少理，向女友投下信任票。Alex用篤定的語氣說：「我聽到之後一啲感覺都冇，根本冇可能。我好清楚大家嘅關係，如果感情有問題一定感覺得到嘅，我哋成日見，冇見時都一日通兩次電話，我完全覺得佢冇問題。我哋冇特別攞件事出嚟討論，如果我特登去問，表示我唔信任佢。」
空穴來風，未必無因，Alex真的對女友沒半點懷疑？他說：「佢後生靚女有人追都唔出奇，但我相信佢對我冇變，兩個人相處，信任係好重要，呢方面我哋做得好好，大家畀到大家足夠嘅空間同信任。有啲報道要點作就隨便，只要唔好太過份，我都唔會怪佢哋。每個人成長時面對唔同嘅嘢就會令個人有改變，你話拍咗五年拖，乜都試過晒好了解，呢啲咪就係我哋未經歷過，𠵱家遇到呢個考驗，就令我哋感情變得更好。」
既然互相信任，何時拉埋天窗？Alex笑說：「暫時我哋都未諗住，或者四十五歲之前啦，我𠵱家先二十三歲，我細譚校長兩年㗎嘛，重有幾十年呀。其實呢方面我同Cathy有共識，我哋兩個𠵱家好享受現況，最緊要開心啫，雙方家長又冇畀壓力，我覺得𠵱家好幸福。」