最近外國有傳媒報道，指德國福士車廠現正密鑼緊鼓，研製緊一款有望於2005年推出嘅新款開篷跑車，而矛頭重直指蓮花Elise及豐田MR2等開篷跑車㖭！
從預想圖中可以睇到，呢款暫未有確實名字，但有可能會被定名為Spyder嘅新款開篷跑車，可謂極具跑車意識，低斜頭燈組合襯以富流線形嘅車體設計，加上有四輪闊大跑車合金胎軨襯托下，就能將呢個特點徹底地顯露出來；然而，車廂布局亦會以跑車化為主，不過詳細資料仍有待廠方公布後方可作實。至於機械配搭方面，廠方預算會為新車提供多台引擎作選擇，當中包括1.6公升（120匹）及2.0公升（150匹）等型號，加上車重只有約800kg，性能表現可謂毋庸置疑。若然你對呢款新車有興趣的話，就不妨留意佢嘅確實推出日期喇！