傳統齋菜，大多是以山筋、青菜為主；雖然味道不俗，但變化不多，食法次次如是，難免吃出個鳥來；於是我今次找來兩間新派素食館，他們不約而同地將泰、法、意、日等多國不同菜譜，融入新派素食文化之中；齋菜款式叫你賞心悅目之餘，味道好兼食得健康！
OL至愛素食飯堂
一見老闆娘，相信大家會馬上認出她是周秀蘭（Christy）；原來Christy早在十數年前的電視藝員年代，已經歸依佛門，「開齋舖其實是我的心願之一，煮好齋菜更是人生一大目標；基本上這裏的菜式都是以新派健康素食為主題，現在的香港人，已經將食齋和信佛分得好開，信佛守齋戒的人固然要茹素，就算一般人都會為了健康着想，吃多了素，少了肉食！」
講到佛誕將至，Christy話最近食館做了好一陣子新裝修，今個星期尾剛剛重新開業，所以特別做了幾味新菜式，我好奇是否特別為佛誕預備？Christy卻說：「基本上，佛誕日子只需用花果敬佛或者誦經即可，如果夠誠心，日日都係佛誕！」
滾滾紅塵$68
這是Christy的至愛菜式，差不多每次試菜，都會吃上白飯三碗，而火鍋料有鮮冬菇、靈芝菇、素腩、素鮮魷、黃螺、蘿蔔、金菇、紅椒、香芹及泰醬等，全部用上素料，再配以一個酸酸辣辣湯底，一邊食一邊用火爐熱住，真係食幾耐都一樣好味！
眾多新菜式中，以這道「萬紫千紅紅梅雙菌」最應節，事關佛誕日子，大家除了要茹素，花果食品更是不可或缺，此菜是以士多啤梨為主角，再伴以靈芝菇及鮮白菌等雙菌一齊食；菌類食品清香，拌以士多啤梨的酸甜口感，不折不扣是道夏天開胃菜式。
漁人得利$68
齋舖食飯，竟然有成條魚上枱，真係非常搞鬼，為此Christy特將原條有頭有尾的素桂魚切件，再配以菠蘿、素火腿、素鮑片及香檳汁一齊食，講真！這道菜口感極似桂花魚，而且起魚塊式清蒸方法上碟，賣相直頭幾可亂真！
香蕉荔卷$65
賣相有幾分似日本壽司，而材料則用上新鮮芋泥，內藏香蕉片、外包紫菜皮，一入口先是吃出芋泥香軟；當你慢慢吃下去時，最後是入口即溶的香蕉片，在你脷底留下一層清香的鮮果汁液，作一般餸菜或甜品，一樣正斗！
寶光素食
電話：25063377
地址：銅鑼灣時代廣場食通天12樓1203室
不知是否信佛之人特別喜歡開齋舖，位處油麻地的如意素食，老闆娘黎太一樣誠心歸依佛教，而且和負責煮齋的吳基國大廚一樣，已做了20多年的齋舖生意！
在這裏食齋有一個常見現象，就是會碰到不少僧尼在這裏開餐，據負責人表示，開舖之初，在選址上特別選了附近較多寺廟奄堂的油麻地區，是為了方便一些僧尼修佛之人，「佢哋喺呢度食齋菜，重長年有85折優惠！」。
而且為了要做到「純齋」境界，這裏的煮食用具，都會跟足傳統「純齋鑊」的規矩，亦即是所有食具不能用作肉類煮食，所以要守齋之人，會食得特別放心。此外，員工的「福食」都全以素食代替，員工表示：「開初都有啲唔習慣，不過食耐咗好似冇乜嘢！而且𠵱家開始出街食飯，重變得無菜蔬不歡！」至於菜式方面，如意基本會做最傳統的齋食，而新派素食方面，泰、法、意、日完全有齊，真係唔講得笑！
山葵脆鱔即是一般人所講的日式芥辣脆鱔；食落口最難得之處，是師傅用簡單的冬菇絲釀入麵粉條扮脆鱔，小記試食後，真係覺得佢連魚皮、魚肉嘅細緻口感都模仿出來，最後再加入山葵的辛辣口味，的確是一味100%仿真的和風魚食。
芸芸菜式中，以這味泰式辣椒乾炒素肉最惹味，泰式青、紅辣椒，配以特等靚醬油炒素五花腩肉，至正之處是炒得夠乾身，有大牌檔鑊氣Feel！夏天暑熱天氣，用作送飯一流；不過大家點菜前要留意，此道菜辣味較重！
一般齋菜，真係好難有西菜感覺，據吳大廚表示，其實他不時都會四出食各國名菜，來取新齋菜靈感，像這道香草鮮蘆笋帶子蝦仁（伴黑菌汁燒雞扒），便是從一味法國菜所演化出來，而且菜式陳設完全學足，鬼斧神工。
意大利雲吞$62
這菜最受附近的女食客歡迎，雲吞用上香口的芝士餡料，汁醬則是白汁香草配鮮蘑菇腿茸；陣陣香草氣味，滲入味濃的芝士雲吞之內，啖啖濃味之餘又有一份清香氣息。
如果唔想逐樣菜點，臨近佛誕的數星期，這裏特意推出一個「歐陸風情二人套餐」，基本有三菜加二碗湯，還加送日日不同的合時甜品；當中菜式包括有法式焗田螺、黑椒銀鱈魚拼素柳、意式茄醬千層麵及海鮮南瓜湯等！
如意素食
電話：27802230
地址：油麻地彌敦道530號地下（即現時點商場地下）
浴佛大典，莊嚴肅穆，善信浴佛，有住持全程作指引，斷不會做錯步驟，褻瀆神明，反而上香一環，卻為人所忽略，西方寺監院寬運法師說：「浴佛，唔係求神畀着數你，而係藉住紀念佛陀嚟清洗身垢，所以要必恭必敬，就算上香，亦有一套嚴謹嘅步驟，希望善信遵守。」
1.誠心淨意
下跪蒲團，微昂首，眼觀前方的阿彌陀佛、觀世音菩薩及大勢至菩薩，心無雜念，別四處張望。
2.持香手勢
清香1支已足夠，兩手圍拱，清香藏在食指與中指之間。
3.香與眉齊
把已燃點的清香置額頭對落位置，不要高過雙眉，以示尊敬。
4.腰肢挺直
不用鞠躬不用叩頭，只要保持腰肢挺直即可。
5.雙手上香
雙手把清香輕輕地插在香爐內，要插得穩陣，別東歪西倒。