叶姊妹話佢哋研究咗中醫食療美容效果十幾年，就算喺外國都會專登幫襯高級中國藥膳餐廳，有兩樣嘢佢哋一定食，就係韓國人參（箭嘴示）同龜苓膏，難怪佢哋啲皮膚保持得咁好啦。
今次叶姊妹去新加坡其中一個重要任務，就係狂掃中藥，妹妹叶美香話，次次恭子都要佢做白老鼠，試吓啲藥使唔使得喎，呢個妹妹都算唔話得囉。
自認每次買親嘅嘢都係最貴嘅叶姊妹，喺新加坡就即席示範咗一日買千幾萬日圓（約百萬港元）靚衫嘅看家本領，當中鑽石同皮草當然唔少得啦，佢哋話因為要去歐洲，先至求其執少少咋！
叶姊妹專揀貴酒店，今次入住嘅TheFullertonSingapore房租幾錢佢哋死都唔肯講，但以一間天花十幾米高、放得落佢十箱行李嘅最貴套房嚟講，唔使問起碼幾萬蚊一晚。家姐叶恭子話佢會要求酒店提供二十四小時貼身服務，想睇煙花就即刻要人放畀佢睇喎！