禮拜六將係都靈市嘅大日子。假如祖雲達斯能夠砌底拉素，而國米又失分畀阿特蘭大，祖記就即刻提前封王；不過同市球隊拖連奴如果贏唔到烏甸尼斯，就即時宣布降班，令都靈市隨時呈現兩極情緒，咁嘅情況認真少見。
提起拖連奴就令人傷感，話晒呢隊波都係傳統勁旅，如果唔係響一九四九年空難死晒成班職球員（十幾個意大利國腳㗎陰功），搞到球會中落，𠵱家都靈市就未必由祖雲達斯獨大。
兩隊向來都係死敵，一個唔覺意今日真係一隊稱霸另一隊降班，對拖連奴球迷簡直係雙重打擊，以後重有地方企嘅？今日佢哋對手烏甸尼斯有比托圖同埋羅薛圖停賽，我求大俠即管睇吓拖連奴球員生唔生性，就算要降班都唔好揀今日呀。
亞洲三個足球強國日本、南韓同伊朗都有球員喺德甲搵食，當中以效力漢堡嘅伊朗中場馬達維基亞表現最好；事關佢嘅助攻次數係今屆德甲聯最多，共有十三次。呢個禮拜六漢堡作客要搶分護級嘅科特布斯，即管睇吓馬達維基亞，可唔可以繼續發揮佢助攻王嘅本色喇！
車路士喺禮拜四推出佢哋喺未來兩季嘅全新主場波衫，重會喺本月十一日嘅超聯煞科戰，着嚟對到訪嘅利物浦㖭。𠵱家車仔同利記爭緊下屆歐冠盃席位，佢哋着新衫打煞科戰，無非都想喺賽前增加聲勢；如果佢哋今日打冧韋斯咸，下場就形勢大好，着乜都唔怕啦！
曼城喺英超聯煞科日主場對修咸頓日前賣飛，無將三千張門票分配畀客隊球迷，只係畀咗千多張，目的係想增加主場優勢，得以更高排名贏多啲獎金！不過修咸頓梗唔制，重話會告曼城。我求大俠就覺得都係算罷啦，你哋班球迷寧可撲足總盃決賽飛，睇嚟你哋都會留力打足總盃！
姚明雖已提早收咧，返回上海老家去也，不過呢位NBA新貴依然財源滾滾來，著名汽水牌子百事剛宣布委任他為代言人，與碧咸共事；另一間大型連鎖咖啡店星巴克亦希望他加盟旗下，不過由於該公司老闆亦擁有NBA球隊超音速，按例唔容許雙方有商業合作，但無論如何中國巨龍成為NBA的廣告寵兒，已是鐵一般事實囉！
皇馬前鋒樸迪路日前突然話，上年夏天皇馬話唔買朗拿度，最後咪又係買咗返嚟，𠵱家又暗示唔買碧咸，隨時又會簽埋佢。我求大俠就話，呢啲說話係樸迪路你講嘅咩？啲傳媒講就得，咁口多，小心皇馬唔「合皮」，一怒之下雪埋你㖭呀，儍仔！