一度將細價股玩到翻天覆地的大檸檬系統，近排突然變得異常沉靜，早排佢嘅仇家肥仔，被迫離場兩年，但亦唔聽到佢哋有乜聲氣，令小初同成班朋友都覺得好奇怪。
估唔到年輕賓架竟然最多料收到，佢話大檸檬系正逐步淡出股壇，手上的殼股陸續在市場上放售，好似活力世界（8100）已經更換咗主要股東，最近連管理層都大換班。
據講最新1隻有得傾嘅殼股，就係人人控股（059），但人人控股早排先至公布1供1供股集資，每股0.018元，集資1210萬元，因乜原因股都未供完，就傳出賣盤？
年輕賓架話，真正原因佢都唔太清楚，市場傳聞可能同監管機構大晒有關，令細價股愈嚟愈難玩。其實除咗肥仔被罰停賽外，股壇上最大炒家早排亦已停賽，加上佢哋嘅旗艦大凌集團（211）停牌多時，至今復牌無期，以上種種打擊，令佢哋唔玩亦唔出奇。
慕容小初