鄭伊健最近趕拍同黎明合作嘅新戲《雙雄》，噚日伊健朝早七點幾就喺英皇道一幢住宅大廈嘅平台拍槍戰同吊威吔戲份，點知拍到晏晝十二點幾，有位外籍住客報警投訴，話劇組未經佢同意，喺佢住嘅大廈拍戲，重話太嘈造成騷擾。
警察到場後，嗰位住客要求警方調查同勒令劇組收機，電影公司負責人就向警方出示許可證，證明大廈業主立案法團同意佢哋喺度拍戲，警察見狀就收隊走人，劇組亦繼續開工。點知個外籍人士唔死心，又打多次電話報警，如是者報咗兩、三次警，警察都冇佢符。
馮仁昭見到伊健着住套西裝坐喺一邊等埋位，佢無奈咁話：「我都知有人投訴，聽聞係個外國人，話我哋拍槍戰戲砰砰聲嘈住佢嘛，我哋都差唔多拍完啦，又依正手續搞嘅，差佬都話係個外國人有問題。」
陳加玲前晚去中環dragon-i個party時，大呻因為非典型肺炎肆虐，𠵱家佢連去蒲同買嘢嘅心情都冇埋，陳加玲話：「呢排多數留喺屋企，麻雀都打少咗。」
問陳加玲點解好似唔見佢出席雀友寶詠琴嘅葬禮？佢話：「我嗰日包到實一實，你哋認唔到我啫。」
組合E-Kids噚日喺九龍塘某籃球場幫廣州電視台拍攝宣傳片段，現場吸引咗十幾個歌迷圍觀，其中阿Tim嘅女歌迷重突然喊起上嚟，要Tommy走過去安慰佢，阿Tim之後解釋話：「個女歌迷話我唔記得佢叫乜嘢名，所以喊啫。」
古天樂噚日接受商台節目訪問，有雜誌話古仔嘅唱片公司認為佢歌藝唔好，要求佢喺新大碟入面着泳褲拍寫真嚟促銷唱片，古仔講笑咁話：「着泳褲可以促銷咩？咁酒樓業咁差啲員工咪要個個着泳褲賣點心，根本促銷同泳褲係兩回事，但我承認我嘅歌藝仍須努力，希望大家畀啲時間我。」
樂壇班霸Beyond前晚喺紅館舉行第二場演唱會，黃佩霞同劉曉彤都分別嚟捧場，其中黃佩霞重帶埋外籍男伴嚟睇騷㖭。問黃佩霞個男伴係咪佢男友，佢冇出聲，只係笑笑口揮手同記者打招呼。
而劉曉彤為咗趕住入場，竟然跨過場外欄杆，身手都算敏捷囉！
