峻峻及昉昉兩兄弟雖然整天待在家中，但就全不覺悶，因為大白天可以一起溫書做功課兼打機下棋；晚上，爸媽一放工回來，就全家一起玩遊戲。鬼馬的爸媽，甚懂得利用家中資源，無論是衣夾、咕𠱸、雜誌，都可成為遊戲工具，玩起來亦有趣又有啟發性，多玩幾次，小孩就能自創新玩法，從遊戲中更可訓練腦筋，絕對符合寓遊戲於學習的道理！你睇，佢哋玩得幾開心，直情將屋企變成遊樂場！
記者：梁佩芬
攝影：周旭文
Model：仇氏家庭
鳴謝：智樂遊戲資源中心
材料：地墊?咕𠱸?大毛巾
爸爸還記得小時候玩的「埋洲」遊戲，今次改一下玩法！他準備了兩個咕𠱸放在地上當是「島」，自己則扮演鯊魚，準備去捉媽媽及兩兄弟。做鯊魚的爸爸一路唱歌，唱嘅就永遠係佢最耍家嘅「半斤八両」。當他一停唱，媽媽三人就要衝上島上，免被「鯊魚」咬！
材料：木衣夾一大堆
媽媽咁鍾意玩家庭遊戲，因為可以完全善用屋企資源，她笑道：「就算一些好簡單的物件，都可設計成多個遊戲，好似木衣夾都至少有兩個遊戲。而且，用家中物品玩遊戲，能同時訓練小孩愛惜物品，如果爛咗，下次就無得玩啦！更重要是，佢哋少咗叫我去玩具舖買玩具！」
猜包剪揼論輸贏，是昉昉和哥哥一個常用的解決問題方法，爸爸就發明新的獎罰方法，令遊戲更加刺激。OH！峻峻輸咗，爸爸要罰佢，將一個衣夾夾喺佢身上，玩完後，睇吓邊個身上最多夾就係輸！
昉昉輸咗，大叫：「呢次唔算數！」爸爸兩眼一轉即諗到：「不如玩層層叠！」方法就是每人分十隻衣夾，每次每人用三隻衣夾叠一層，睇吓邊個整塌啲衣夾就輸啦！
材料：每人一把雨傘
聽聽媽媽的創新論調。「包剪揼唔一定要用手玩，我哋加啲難度，用遮當手，考你反應之餘兼可訓練你記憶力。」媽媽建議的方法好簡單，一人一把雨遮，開遮是「包」、半開是「剪」、閂遮是「揼」。但記得，玩嗰時唔好亂咁用遮篤對方，而且一定要家長陪同下先好玩！
材料：報紙、雜誌紙、膠碟、剪刀
媽媽的遊戲鬼主意可真層出不窮，有花氣力的雨傘包剪揼，又有靜態考手藝的小玩意，不過共同的特點是不費分文。今次就利用一大堆過期雜誌做工具，齊齊動手摺魚仔，一起玩個漁夫打魚遊戲。
材料：一對拖鞋
昉昉雖已八歲，但就成日坐唔定，好難集中精神做一件事，就算食飯都成日兩頭騰，媽媽要諗計教他集中力！原來方法好簡單，玩玩傳拖鞋遊戲就可以！今晚重有隔籬屋兩個姐姐一起玩。首先大家圍成一個圈，要昉昉坐中間，閉上眼，身邊的人就負責傳拖鞋。昉昉要靠耳朵，聽聽拖鞋傳到哪裏，當昉昉大叫：「停！」時，就可張開眼猜猜拖鞋在哪人手上！