巴西前鋒朗拿度噚日朝作客墨西哥踢到不知所謂，皇馬應該會好閉翳，但係我求大俠就提醒皇馬，用摩連迪斯可能再有意外收穫。
雖然摩連迪斯今屆喺皇馬俾哨牙度搶咗個正選位，但係佢始終係好球員，好似日前代表西班牙迎戰厄瓜多爾打正選，踢咗六十六分鐘入三粒，最後西班牙大勝四球；之前迎戰華歷簡奴時佢喺末段後備上陣，就梅開二度，幫皇馬反勝三比一，好似已經成為另一個後備殺手。
其實皇馬將好有機會賣走摩連迪斯，咁不如畀佢多啲上陣，等餓波好耐嘅佢打啲爭氣波，而人哋又可以多啲時間睇辦，何樂而不為？況且魯爾又要養傷，朗拿度去完墨西哥打國際賽後一定好攰，計嚟計去，皇馬如果要喺禮拜六順利打敗客軍馬略卡，畀佢做正選應該穩陣啲。
意大利國家隊前日派二線兵作客照贏瑞士。回想瑞士足總早幾日鬧意軍收起咁多主將，擺明係睇唔起同埋對佢哋國家隊嘅一種侮辱喎。結果人哋係就係出晒副選，但一樣反勝你哋呢隊夫添出擊嘅國家隊。技不如人，連人哋二線兵都贏唔到，下次都係唔好亂鬧人嘞。
相信冇人諗到，蘇格蘭喺主場對住上場輸四粒畀捷克嘅弱隊奧地利，竟然輸○比二。我求大俠真係替佢哋領隊福士擔心，事關佢搞到隊波咁（戰績係三贏一和九輸），球迷、蘇足總高層同球員都唔妥佢。除非蘇格蘭下場贏到德國，否則福士應保唔住個位。
聽講阿仙奴好想斟列斯嘅新晉英格蘭門神羅賓遜，以代替老將施文；但係，羅賓遜話因為喺倫敦嘅房屋，冇足夠空間畀佢兩隻拳師狗走嚟走去，所以唔諗住過檔兵工廠，寧願留喺列斯。羅賓遜寧願要狗都唔要前途，真係好儍。我求大俠希望佢可以三思而後行。
喺上屆攞到德甲聯、德國盃同歐冠盃三個亞軍嘅利華古遜，今屆搞到要打護級戰，皆因後防太過弱；好彩佢哋陣中班主力𠵱家嘅狀態唔錯，其中施夫高域同貝碧托夫，重喺周中嘅友賽有波入；希望周日對比勒費爾德，幫利華古遜搶到三分就好啦！
噚日一位拓荒者嘅球迷報警，投訴柏賓喺上個禮拜日贏咗小馬之後，向佢爆粗兼將水杯掟佢。有目擊者指柏賓不滿個球迷不斷喺場邊寸佢，喺一完場就向嗰個球迷還以顏色。我求大俠雖然唔贊同個球迷嘅行為，但係身為拓荒者老大哥嘅柏賓，非但冇以身作則，反而向球迷動粗，唔怪得拓荒者臭名遠播啦！