剛於香港推出全新Vectra車系嘅德國歐寶代理，嚟緊可謂新車一浪接一浪，除剛抵埗嘅2003年新版Zafira七人MPV，有新造型同車廂鋪排之外，大約喺年中嘅6月時分，佢哋又打算引入埋部跟蓮花Elise同級嘅Speedster開篷跑車。雖然早前因Speedster未能加裝冷氣，而取消到港嘅念頭；但畢竟呢部開篷跑車，可代表歐寶車系動感一面嘛！因而佢哋高層決意引入囉！聽聞遲吓重可能會引入埋配用Turbo偈嘅Speedster㖭！鍾情呢類開篷跑車嘅Fans，若然唔介意部車無冷氣裝備的話，就記緊留意吓部歐寶Speedster，遲吓到埗嘅消息喇！