鍾麗緹日前穿上結合中國味與性感的上海灘服裝，為一本高級時尚雜誌拍攝封面。訪問中，她談及對電影及中國的熱愛，但決不會為了進軍荷李活，而甘願當花瓶角色，亦因為此原因她推掉了《變種特攻2》。
鍾麗緹（Christy）登上最新一期《BInternational》的封面，她穿上既性感又不失中國女性含蓄美的上海灘新裝，散發出無窮魅力。
Christy近年由於結識了北京男友嚴仲輝，所以逐漸把基地轉移到該地，她說：「我除咗喺北京置業外，重打算年尾喺北京開一間越南餐廳，我男友亦喺北京開設製作公司，我哋會一齊傾電影題材，如果劇本搞掂就會搵老闆投資。」
對於電影的看法，Christy說：「我其實好鍾意拍笑片同動作片，但係好可惜呢類電影都係同獎項無緣嘅。至於打入荷李活，當然係每個演員嘅理想，但係我覺得大部份荷李活電影都將中國演員搞到唔似中國人，好似李連杰咁，佢喺西片度根本同任何一個西方動作演員冇分別。」
Christy續說：「而我曾經有機會接拍《變種特攻２》同《凸務之王》，但因為個角色其實都係花瓶，我終於都推咗，我亦好開心自己可以有勇氣推咗一部荷李活大製作。」
雖然Christy對北京有極大的好感，但由於非典型肺炎肆虐，視女兒為第一生命的她，為了女兒健康着想，亦得暫時放下手頭工作，返老家加拿大避炎，她說：「我係成年人識照顧自己，反而最擔心個女，啱啱爆發非典型肺炎嗰陣，我屋企個菲傭有幾聲咳，我都唔敢叫佢去人多嘅地方。」