若果大家呢排都迴避食肆的招徠，不妨到郊外走走，唔係叫你去燒嘢食，而是郊外其實亦有不可錯過的食店，價錢大眾化之餘，重要係可以呼吸到新鮮空氣，小記當日就搵到西貢三間風味迥異嘅食店，雖則不是甚麼新店，但亦不時推出新菜式，飽腹之餘又可舒壓，採訪期間更發覺不少人舉家到此。
記者：黃思濃 攝影：周旭文 Model：Irene
逢星期一至三、五刊出
喺白沙灣滘西新村觀音廟側有一間葡國村餐廳Pousada，亦有美味嘅葡式海鮮，呢間西餐廳由丁屋改建而成，地下係酒吧，二樓餐廳，天台(三樓)有帳篷，天氣晴朗時打開帳篷可以睇星，享受海風吹拂，那時再享用銅煲燴海鮮和冧酒，一流！呢間開放式嘅餐廳好多英國人幫襯，最鍾意坐地下外邊摸住酒杯傾偈，一派西式休閒。
呢味葡式主菜有蝦、蟹、鮮魷、青口、蜆，以薯仔墊底，用鮮茄燴，食到最後千祈要食埋墊底嘅薯仔，吸晒海鮮同鮮茄味道，佐葡萄白酒或冧酒，正！
地址：西貢白沙灣滘西新村112號
電話：23355515
沿西貢公路經白沙灣直至西沙，沿路有很多食肆，周末嚟到白沙灣滘西新村，亦即係白沙灣碼頭附近，我先入咗去一間酒樓，同朋友霸咗個海景位，可以望到白沙灣，望咗一陣就已經急不及待叫餸，原來酒家三味鎮店之菜就係炭燒肥鵝、富貴百子蝦和椒鹽靈芝菇，是老闆推介之選。
講起燒鵝，一般都係用煤氣爐燒烤，現今惟有去到郊區嘅食肆才食到用木炭燒烤嘅，除可保留更多肉汁，而且這碟燒鵝最少重四斤半至五斤，份量十足。
用上游水麻中蝦與日本蟹子一齊清蒸，一隻蝦分三啖食，先咬已去殼嘅蝦身，連埋蟹子一齊咀嚼，蟹子卜卜脆配上清甜的蝦肉最特別，第二啖食蝦頭，肥膏油滲滿成口，第三啖再食埋蝦頭塊肉，這才叫做食盡真味。
去西貢又點可以唔去提供印度和泰國菜的「西沙」？店東黃先生自小在德州長大，佢好欣賞歐派露天咖啡茶座，希望有一日能開檔。返回香港後放棄髮型設計，親自去泰國和印度搵廚師，終於能夠將理想化為現實，佢話：「我係香港第一批申請到露天食肆營業牌照嘅。」
訪問了前來避炎的林氏、李氏一家，佢哋都話：「已經有幾年無嚟過，今晚嚟避炎，順便食埋好耐無食過嘅泰國燒烤同印度烤餅，喺園林下飲冰涼嘅泰國特飲，好爽！」
剛端上枱嘅魚，仍然熱辣辣，喺呢個時候及時將甜酸辣混合的芡汁淋上魚身，夾一塊入口，簡直係甜酸辣香脆嫩俱全，笋殼魚魚身嘅焦味亦很惹味。
地址：西貢西沙路十四鄉泥涌村10號C
電話：26418029