噚日係白雪仙七十五歲生日，有唔少朋友同圈中好友都去咗仙姐位於跑馬地逸廬嘅屋企同佢慶祝，仙姐啲戲迷喺朝早十一點已經揸住束花喺仙姐屋企樓下等，張國榮契媽張玉麟夫人最早嚟到，之後就見到伍秀芳、陳淑芬丈夫陳柳泉同梅雪詩喺兩點幾分別嚟到，陳寶珠就三點四十五分到，反而仙姐契仔唐鶴德就冇嚟。
其實張國榮嘅死對唐唐造成咁大打擊，呢類喜慶場合佢就算唔嚟，仙姐都可以理解，而仙姐為張國榮嘅死都好傷心，唔多願意見人，因張國榮生前周不時會陪佢打牌同飲茶，對佢老人家極之有心。寶珠姐知道仙姐近來心情唔多靚，所以專登嚟陪佢老人家打牌。
上海姑娘胡蓓蔚最近準備返上海探屋企人，佢呢幾日重特登去買咗大批口罩同消毒用品，佢噚日喺電話度話：「上海𠵱家都好緊張，呢排好似又話返上海要隔離十日，所以都唔知點，我好想返去見屋企人，如果真係要隔離就好冇意思。重有，因為受非典型嘅影響，就連工作都大受影響，損失都唔少。」
男子組合E-Kids噚日去咗赤柱廣場出席抗炎活動，佢哋教歌迷跳舞，以增強身體免疫能力，近日有消息傳出佢哋間公司東魅將會執笠，E-Kids話：「我對公司有信心，相信唔會有呢一日，我呢排都忙緊錄音。」
黃伊汶同Twins噚日喺銅鑼灣為電視劇《功夫足球》試造型，黃伊汶嘅造型要戴假哨牙同掃把頭假髮，都幾醜樣。黃伊汶話：「棚哨牙係倒模訂做，我接呢套戲都諗咗兩日，之前試造型嫌唔夠醜就加埋雀斑。」而Twins嘅蔡卓妍就話同張衞健再合作，都唔怕再傳緋聞。
鄭少秋噚日返將軍澳廣播城拍電視劇《非常外父》，問到近日台灣非典型肺炎好嚴重，佢嘅台灣太太官晶華會唔會好擔心？佢話：「反而老婆屋企人打電話嚟安慰我哋，呢排都冇考慮返台灣探親。𠵱家連讀中學嘅大女都復課，我同老婆都成日苦口婆心去叫佢戴口罩。」
方力申以六位數字酬金，成為雀巢冰極檸檬茶嘅代言人，噚日以「冰極型仔look」喺又一城溜冰場舉行大型記者會，大會安排咗幾位溜冰好手喺方力申唱廣告主題曲《冰極兩公里》時伴舞。佢重話經理人想佢改變形象，要成熟兼有內涵，佢話：「𠵱家要喺服裝上面改變一吓，每個月開支都大咗。我冇叫公司津貼，只係叫公司幫我搵多啲工作。」
