五一勞動節假期小初唔敢返大陸打波，惟有留港搵老友吹水，同經紀陳食飯傾開，覺得有件事好奇怪，就係高寶綠色科技（274）公布全年業績，盈利勁升逾7成，但股價只係載浮載沉，在1.30元徘徊。
小初唔明高寶業績咁靚，但有關人等冇趁機炒作，雖然隻股家陣成交在二三線股中算係強勁，不過上升力度同氣勢，就明顯不及以前。
經紀陳話小初有所不知，高寶上市後炒得有聲有色，業務又有概念，確實吸引唔少人投資，所以街貨唔少，重有高寶以往發行過一些可換股票據，原來已兌換得七七八八，加上批股集資，家陣高寶已發行股數多咗好多，貨源亦較分散。可能一來炒作成本唔平，二來隻股已經降溫，所以人哋暫時唔趁機炒業績，亦唔難理解。
高寶分拆旗下污水業務上市，已流傳有一段日子，但至今只聞樓梯響。經紀陳話，目前確係在搞緊，而且唔止分拆一項業務，高寶的生物科技生意，據聞亦有意分拆上市。
慕容小初