假前恒指回落27點，估計短期仍係反覆之局，恒指𠵱家8717，若然再上多些少，吼位揸啲Put輪搵食。
長實（001）末期息1.22元，下周三除息。和黃（013）末期息亦係1.22元，下周再下周二除息。兩隻大藍籌若然呢幾日搶息炒高，不妨趁低位買啲相關Put輪，等正股除息後少咗搶息因素下跌。長實Put輪對象係9743，9月到期，現價65仙，溢價6%，槓桿率6.6倍，計埋正股除息因素，實際溢價係3%左右，唔貴。和黃Put輪對象係9752，8月到期，現價49.5仙，溢價7.7%，槓桿率8.8倍，計埋正股除息因素，實際溢價唔使5%，唔算離譜。兩隻Put輪，等候再跌10%以上買入。
新地（016）周二彈升2.20元，前日周三回落1元，有機會反覆吓，等機會彈多些少上去，吼位買Put輪9676同9730。9676今年7月到期，現價83仙，負溢價0.3%，槓桿率4.4倍。9730係「知足輪」，封底價32元，今年8月到期，現價52仙，負溢價0.5%，槓桿率7倍。呢兩隻輪由於冇晒溢價，輪價對正股之反應會好直接。
吼大市升而揸Put輪，吼大市跌而買Call輪，可以直接賭恒指輪。最好揀大成交窩輪，方便上車，亦方便跳車。
章盛