通常發展商想個樓盤快啲賣清光，都會搞代理銷售比賽，用一招「重賞之下必有勇夫」嚟鞭策經紀，代理多勞多得之餘，個盤又賣得快，一家便宜兩家着。長實早排搞咗個四月份畢架山一號銷售大獎，邊間代理行喺上月做得最多成交，就可奪得二十萬銀獎金，以示獎勵。
比賽為期一個月，鬥足三十日。到咗最後一日夜晚九點幾，幾間代理行中，中原做得最多單數，一直領先，諗住個獎無走雞，成班中原高層就拉隊去慶功。點知，利嘉閣就喺距離凌晨十二點比賽結束前一刻，做多咗一單，贏個馬鼻。所以話，比賽嘅嘢，未到最後關頭，真係唔知鹿死誰手。
為咗刺激商場人流，新地由聽日開始到十一號，推出「400萬元大激賞」計劃，以送錢、送禮品同埋泊車優惠，吸引市民喺母親節同埋佛誕假期消費。
重頭戲係大抽獎，只要喺新地旗下十二個商場購物滿三百元，可參加大抽獎，獎品係一千元購物現金券，名額六百個，其他獎品包括「呵護三寶」、消費優惠券、額外一小時免費泊車券等。新地旗下商場包括沙田新城市廣場、銅鑼灣世貿中心、旺角新世紀廣場同將軍澳東港城等。
另外，新地聘請嘅五百位抗炎大使，未來幾日就會開工，專責喺新地旗下商場為客人開門、㩒𨋢同埋消毒公眾地方。
衞生署公布咗疫廈名單後，上榜物業成交同睇樓量都跌咗；不過，跌還跌，仍然有人大無畏去疫廈睇樓，當然係去執平貨，淘大花園自然係目標焦點，其他只發生過一單半單嘅大廈，都有客講明要去睇樓。
蘭西問經紀，遇着咁嘅客，究竟博唔博？點知問十個有十個話一定博。咁嘅時勢，客人大過天，最多帶多幾張消毒紙巾，睇完樓洗多幾次手。
上個月，全城談炎色變，不論一二手睇樓都少咗，成交自然跟住跌，不過，美聯就非常樂觀，董事布少明話，政府推出嘅救市措施，有助紓緩中小企業財務壓力，提升就業率，從而帶動樓市。
佢又話，積壓咗成個月嘅購買力好快會釋放，成交一定會增加。
為咗要迎接呢個升浪，美聯增設現金獎，今個月頭十日，營業額最高嘅十間分行，同埋成交最多嘅五間分行，各得一千大元，即係公司使多萬五蚊去激勵員工努力打拚。
華人置業舊年底以超過十億元奪得尖沙嘴東英大廈，啱啱正式接收大廈業權，今日舉行小型記者會，講解物業日後發展大計，並且由華人置業集團助理租務經理廖家和主持大局。
今日要開記招，係「沙士」橫行下，華置噚日特別搵咗清潔公司為大廈大規模清潔同消毒，希望可保障商戶及顧客嘅健康，同時解除佢哋使用大廈嘅憂慮，咁樣蘭西去記招都會安心得多。
蘭西
電郵地址：
