何韻詩早前自爆沐浴愛河，但一直被人質疑性取向的她，卻不願公開其另一半的性別，她只肯透露與新拖友感情穩定，也拜候過雙方家長，不過何韻詩表示最重要是伴侶要對她專一，不可勾三搭四。
何韻詩曾與劉浩龍傳緋聞，但她與容祖兒（Joey）和陳文媛（BoBo）也分別傳出緋聞，正當別人猜測其性取向之際，她卻突然自爆蜜運中，但她卻不肯公開其另一半是男還是女，她說：「藝人要有一啲神秘感，可能我嘅神秘感就係呢方面，佢係男定女要保密，由大家去估會係幾好玩嘅事，愈唔講大家就愈想知。」
何韻詩還說：「大家點估都影響唔到我，但部份傳媒用啲醜化嘅字眼去寫，我覺得自己冇必要同佢哋一般見識，我唔解釋、唔澄清，係有啲包拗頸嘅心態，如果我要好刻意咁對大家鄭重宣布我係鍾意男仔嘅，就會有少少歧視（對同性戀）嘅成份。」
何韻詩對別人以歧視眼光對同性戀更覺反感，她說：「我諗冇一個人可以好肯定咁講，我呢一世只係鍾意男人或者女人，但我冇話贊唔贊成同性戀，呢啲係好個人嘅選擇。」那她是不是可以接受同性戀？她笑說：「咁我講都得，你話接唔接受到啦？有啲人身邊好多呢類（同志）嘅朋友，佢哋會話『但最緊要唔好搞我』，呢句話好膚淺，無啦啦做乜搞你先？呢句好歧視囉。」
問何韻詩曾否被女同志展開追求？何韻詩笑說：「我身邊係有呢啲朋友，追求呀？男同女都有嘅，只怪我吸引力太大。」至於她現在的戀情，她坦承不多講是基於保護，可以說的是大家已見過雙方家長，戀情令她有肯定的感覺，何韻詩說：「我哋stable（穩定）嘅，感情上我幾需要安全感，我好驚啲人勾三搭四，一遇到呢啲事，我唔會選擇去爭，可能係骨氣問題啦，但呢個算幾專一，反而外形，我就冇所謂。」
撰文：朱芷瑩
攝影：仇志德
髮型：JimmyWhite（Chin.G）
化妝：ArvisLaw
形象：Yan
