兩行好生意 - 左丁山

兩行好生意 - 左丁山

世道不景,百業蕭條,只有藥房好景,追數公司做到氣咳(唔係沙士咳)。報紙說金銀花價錢炒貴八倍,想來其他與抗炎中藥方有關嘅藥材亦會貴晒。唔好話藥商囤積居奇,奸商發死難財,按經濟分析,每一種貨平時需求不大,突然間短時間內需求急升,由於供應追唔上,必定扯貴價錢,此乃市場定律。高價之下,必定刺激供應增加,價錢恢復平常狀態。如果政府控制價錢唔可以升,供應唔會大增,貴價黑市貨就會大行其道,供需無法平衡,消費者重更加慘。胡亂噏控制物資價格之人,唔識經濟學,千祈咪信。

中午飯局時份,藥王T與追數Y都唔見出現,大概忙於做生意,唔得閒嚟見班兄弟矣。藥王T甚為有心,托賓架W送來「五色靈芝」,每人一盒,全不落空。藥王T以前已送過靈芝一次,有人說靈芝能抗百病,加強免疫能力,藥王T希望各兄弟老友保持健康,於是贈送靈芝。
今時今日,健康要緊,發財其次。追數Y唔嚟食飯,自動唔要靈芝一樽,甚為蝕底。不過眾兄弟話,政府推出之十五億元貸款擔保,畀旅遊、飲食、零售、娛樂四大重災行業老闆借錢出糧,實在係幫追數Y發財。何解?政府百分百擔保銀行,銀行唔使有壞帳,但有義務代政府追數,銀行有甚麼依郁,就會叫追數公司去收數,追數Y點都有啲執吓。借錢嘅公司要九成股東簽擔保,唔還錢嘅話,追數公司就會搵擔保股東負責。簽擔保之前,唔該諗清楚。