歌影視全面出擊<br>四餅女2對1追打Twins

歌影視全面出擊
四餅女2對1追打Twins

九人女子組合Cookies已正式淘汰五人出局,改組後變為四人組合MiniCookies,雖然Stephy隨着改組被除去隊長名銜,但四人依然齊心,重新作歌、影、視三棲發展,以一倍人數繼續狙擊死對頭Twins。

九餅女Cookies自被金牌經理人黃柏高羅致旗下後,經過兩個多月來的鋪排,九餅前途已塵埃落定,Stephy、Theresa、Kary和Miki組成暫名的MiniCookies,並計劃暑假出碟再戰樂壇,其餘五餅則被擯出局。

化妝省時間
Cookies出道以來,一直被指模仿人氣組合Twins,現在剩低四餅女,雖然不及以往人多勢眾,但發展將更集中。
目前除了Stephy和Theresa拍攝無綫新劇《戀愛自由式》外,四餅女下半年還會出碟、接拍廣告和進軍影壇,實行歌、影、視三棲發展,繼續狙擊Twins。
Stephy對此笑說:「你哋講就咁講啫,但話晒Twins出道耐過我哋,點可以攞我哋啲新人同佢哋比呀?」
現在Cookies剩下四人,雖然化妝整頭省回不少時間,但感覺已不像從前般熱鬧,Theresa說:「以前好多人,化妝都要等三、四個鐘,𠵱家大家就專心咗。」
Kary說:「人少咗就冇以前咁嘈。」其餘三餅即取笑她:「Kary係最嘈嗰個,佢一個已經好似成棚人喺度咁。」
Miki說:「人少咗又冇話特別唔開心嘅,keep住有嘢做就得啦。」Kary又說:「我哋同其他成員都重有見面,我前幾日至約咗Angela曬太陽,本來約埋Helena㗎,但佢約咗朋友冇嚟到。」

Kary憂前途
Cookies的宿舍和巴士早前已被唱片公司EMI收回,九人現時各自回家居住,不過家住屯門的Miki和Stephy打算物色地方同居,而Kary今年亦中學畢業,現時她正為選擇升學或做全職藝人而頭痛。
採訪:朱芷瑩 攝影:仇志德 化妝:KrisWong
髮型:JimmyWhite(Chin.G) 服裝提供:LcxClubX

Twins
資料圖片

隨着Cookies改組,Stephy亦被除去隊長職銜。

Cookies左挑右揀雪條解暑。