今個星期推出嘅《ThisIsFootball2003》，單係本英日資料集已經成本GT3咁厚，有齊12,000名實名球星英日對照名，真係單買本書都抵，遊戲操控就類似《FIFA》系列，不過開場同球員動作就做得極為仔細，可使用81支國家隊同549個大小球會，個遊戲約售$270左右，有興趣不妨試吓。
充滿美國英雄風格嘅動作遊戲《ViewtifulJoe》，會喺6月12日推出，今次亦會有行貨，唔想好似上次《PN03》咁捱貴貨就好去訂定，想知隻Game有幾抵死，可以去官方網站（ http://www.capcom.co.jp/vj/）睇睇。今星期推出GBA嘅《狐忍》，由於代理缺貨，售價高達 $320，相信都要等一排先跌價。
PS上同《BH》系列同係嚇到你呱呱叫嘅《SILENTHILL》，會喺7月推出，今次行貨同日本版同時推出。而美國國寶級遊戲《盜墓者羅拉》6月10日會喺美國推出。萬眾期待嘅電影《TheMatrixReloaded》，美國就會喺5月上畫，而XBOX亦會喺5月推出勁爆嘅《ENTERTHEMATRIX》遊戲，今次亦會有行貨推出。
文：打機鐵人