有豬朋狗友同阿虎講笑話，佢話香港應趁阿董離港之後封港，唔好畀佢入境，又或者要阿董跨過火盆至畀佢入境。阿虎聽後一笑置之，點知周三阿董一返回香港，港股即轉趨牛皮，恒指收報8717，跌27點，連新增感染非典型肺炎的人數亦上升至17名，阿董真係夠晒黑。
港人最近連返大陸都唔方便，其實亦難怪，內地非典型肺炎潮，連北京都感到吃不消，其他城市又點可以承受得起，所以上海留難港人入境亦有道理，阿董又何必透過中央強人所難，難道阿董重唔知勉強冇幸福。
嘉里建設（683）周三下午突然停牌，市場傳出嘉里會將私有化作價調高，據聞新作價高於每股9元。若私有化作價定於52周高位9.40元水平，對小股民而言，已相當吸引。
不過，機構性投資者就認為，作價應以每股資產淨值折讓30%計算較合理。嘉里去年底每股資產淨值為17.94元，以此計算，每股收購價應為12.55元。嘉里咁快就想調高收購價，唔通非典型肺炎好快就搞掂，為免夜長夢多？
大摩將裕元（551）加入大摩指數之內，周三刺激股價急升4.6%，收報16元。裕元市值高達250億元，大過好多藍籌股，所以重有機會問鼎恒指成份股一席位，可能連中兩元，後市走勢仍不容忽視。
麗展（488）唔肯提高豐德麗（571）私有化作價，註定計劃會失敗，而豐德麗股價早已跌至0.23元，接近公布私有化前的水平，相信後市跌幅有限。
阿虎