「沙士」殺傷力驚人，香港各行各業都遭受重創，已經好殘嘅樓市，更加雪上加霜。同樣俾「沙士」殺埋身嘅上海，前日發售南京西路服務式住宅駿豪國際，竟然一日賣晒六百個單位，似乎「沙士」未有影響當地市民買樓意欲。
金豐易居．鴻運國際行政總裁田國強話，原本諗住留番啲單位畀香港人，但估唔到反應咁熱烈，想留都唔得！今次一Q清袋嘅樓盤，每方呎賣二千蚊，單位由四百二十至一千二百三十七呎，最平單位約九十萬蚊。至於租金回報率約有八厘。
轉搞內地房地產嘅田國強，本來住開九肚山二千二百四十呎嘅洋房，𠵱家搬咗去沙田區，舊居鎖匙亦已交咗畀銀行。佢話已將有用物品收拾，但係大屋搬細屋，所以要將多餘嘅嘢捐畀救世軍，睇嚟田老闆唔見幾籮穀。
今個月十一號係母親節，新世界喺尖沙嘴亞瑪遜商場，嗰日會舉辦「媽咪寶寶齊齊防炎」活動，由媽媽同小朋友一齊參加比賽，順便教吓小朋友防炎知識，贏咗有豐富獎品。不過，要事先報名，喺新世界中心有表格攞，本月七號截止。至於新世界中心就搞「母親節購物大獎賞」。
另外，喺本月八到十一號，喺亞瑪遜同新世界中心消費滿三百蚊（最多兩張發票計）就可以參加抽獎，送出總值三十萬嘅禮品，重係「人人有獎，永不落空」嗰隻。為咗吸引多啲人流，商場大業主真係乜計都出齊。
今日係五一勞動節假期，地產界就照舊搞吓推銷樓盤嘅活動，希望做旺個市。大型發展商今日幾乎全部出動，獨欠恒基同華懋。佢哋旗下獨資樓盤，就冇加入優惠行列。
原來事出有因，恒基當勞（張炳強）話，通勝寫住今日諸事不宜，所以乜都唔搞。不過同人合作嘅樓盤，就有優惠促銷。
蘭西好奇心驅使下睇吓通勝，真係寫住今日忌開倉、忌出財。唔通各位市民今日假期都唔出街，唔消費？喺咁嘅市道，如果話日日都忌出財，個經濟豈不是唔會有復甦嘅一日，市民唔敢消費，商人冇生意做，個社會同停頓咗有乜分別。
正當香港全力抗「沙士」之際，原來香港已經俾外國傳媒講到「百業蕭條，生人勿近」咁滯。喺香港一直幫跨國公司外籍僱員搵樓嘅QueensPropertyConsultants，董事總經理CherylChin話，外國對香港嘅情況唔多了解，傳媒重將香港舖頭執笠等負面消息，全部賴晒同「沙士」有關。佢喺澳洲嘅朋友，最近打電話叫佢快啲逃離香港。
佢話，其實喺香港嘅外國人一啲都唔驚，去蘭桂坊飲酒，一見面就攬攬錫錫，生活都唔知幾正常。
佢認為政府啲官員應該起帶頭作用，唔好再成日戴口罩出鏡同宣傳洗手等。好似之前香港官員同馬來西亞官員握完手，兩個即刻擰轉用消毒毛巾抹手，過程出咗鏡，梗係嚇親啲老外啦。
九龍灣淘大花園成為非典型肺炎重災區，「元凶」懷疑係污水渠，搞到管理公司好唔得閒，急急為旗下管理物業做檢查。
聽信和物業管理總經理杜日生講，其實喺四月初淘大花園報告未出之前，已經為旗下一百四十幾項物業嘅外牆同污水渠，做咗全面檢查同維修。啱啱過去嘅星期六及日係「排污系統檢查日」，做第二次全面檢查同更新。信和重成立熱線，解答業主與住戶問題。
蘭西
電郵地址：
