沙士疫情雖然話穩定咗啲，但大家勿掉以輕心，提防一個唔小心又會死灰復燃，噚日民主黨黨團開會，就上演一幕「沙士驚魂」。
會上大家對黨友非常有信心，除咗李柱銘罩不離口，司徒華偶爾戴吓之外，其他人一於不設防，重講到口水花噴噴。散band之際，副主席何俊仁忽然話：「我好似有啲發燒，個頭好『赤』」。華叔用手㩒一㩒阿仁額頭，都話好似好㷫。阿仁忽然間掟呢個炸彈入會議室，成班人呢個時候先識驚，慌忙周圍搵探熱針幫阿仁量體溫。
探完熱，大家揸住支舊式水銀探熱針，但冇人識睇，馬丁自告奮勇，結果不得了，竟然有38.2度，超過標準嘅37度；如果因為阿仁懷疑惹沙士，而要成個民主黨黨團集體隔離，立法會唔去得，上街抗議又唔得，政府容乜易拿拿聲趁呢個機會搞掂二十三條立法？
不過睇真啲，馬丁發現係自己太緊張，原來支針度數係華氏，即係98.2度先真，未超過98.6嘅標準。
八方問阿仁係咪為咗幫被困台灣嘅香港團回港奔走而忙到病？佢話唔係，不過就唔滿意林瑞麟做得唔夠，但阿董今次都算快手，要記一功，當然做署理特首之曾蔭權都有出力。
傳真︰2623-9278
電郵︰