恒指前日暴升之後，昨日回順少少，靠滙豐（005）進帳1元，恒指收市先至只係微跌27點。
滙豐成批Call輪，槓桿率好高，所以滙豐雖然只係升1.2%，滙豐Call輪紛紛打入龍虎榜，10大之中滙豐Call輪佔咗7件，普遍升幅超過1成。跌幅超過1成嘅滙豐輪，亦有9件，當然係Put輪嗰類。未來幾日，因為滙豐佔恒指比重大咗，有啲指數基金要增持滙豐，滙豐股價都會硬淨，未係時候貪平買Put輪。過多幾日，如果滙豐再升一兩蚊，則可以細細注向啲滙豐Put輪埋手，對象有9616同9669。
威水輪中有件華能Call輪9728，由0.97元升上1.09元，正股（902）升15仙，帶起隻輪。華能宣布今年首季多賺42%，股價反應正面，𠵱家個價，距離歷史新高只差30仙。
9728今年9月夠鐘，溢價2.6%，槓桿率6.8倍，睇數據，重係抵買嗰隻，不過正股價高，恐怕水位有限，隻輪要買嘅話，都要等多一陣。
駿威（203）跌4.6%，相關Call輪散落去。9701收21.9仙，跌19%，11月到期，溢價25%，槓桿率11.8倍。9746收17.7仙，散22%，亦係11月夠鐘，溢價35%，槓桿率14.5倍。除非認為正股即時好番，否則咁嘅數據，買落去輸多過贏。
章盛