上星期日本欄講《讀者願捐錢》，其中有講「中大中醫藥研究所得到余仁生幫忙，生產四萬包中藥劑，派畀醫護人員服用」。即刻引來好多朋友詢問，市面上幾時有得賣？
後來得到接近梁秉中教授嘅朋友澄清，中大中醫中藥研究所派畀醫護人員嘅藥劑，前後四萬二千包，係自己掏腰包嘅，余仁生幫手做嘅第二批藥劑，係用來派畀福利機構兼上市發售嘅，四月二十九日推出市場，每小包賣四元。
中大中醫中藥研究所確係需要各方面捐款支持，首先捐錢嘅，係香港會計師公會，ACCA香港分會，一共捐出三十萬元。梁秉中教授曾任中大新亞書院院長十年，ACCA香港分會會長羅就係新亞會計系畢業生（七九年），有啲關係嘅。香港會計師公會發放「會計同心抗炎顯關懷」，號召全體會員捐款，捐贈弱勢社團，資助社工嘅抗炎物資。會計師今年啲生意其實唔係幾好，多數食穀種，佢哋仍然有此熱誠、熱心，值得我哋鼓掌讚賞。
左丁山認為各社團機構、大公司與其在傳媒刊登廣告向醫護人員致敬，倒不如將啲真金白銀捐出嚟，做一啲具體事務。醫護人員𠵱家咁忙碌未必睇到啲廣告。就算睇到，心領就算，睇多幾次，已無感覺。中大校友捐錢成立一個基金，支援前線醫護人員需要（例如畀錢飯堂煲靚湯送畀佢哋飲），就較為具體。各界有心人請捐錢畀中文大學中醫中藥研究所，支持佢哋研製預防「沙士」藥劑，搵唔到梁教授可找馮國榮博士。