睇到前線醫護人員努力照顧「沙士」病患者，同努力對抗呢隻世紀病毒，我哋呢班小市民除咗可以喺送上祝福外，究竟重可以做啲乜呢？中國甲A球會北京現代班職球員就用實際行動嚟支持前線醫護人員：就係捐錢。
𠵱家喺香河訓練基地閉門練習嘅北京現代，喺了解過北京醫務人員全力投入對抗「沙士」嘅感人事迹後，全隊上下開展咗自發性嘅捐款活動；啱啱返隊嘅教練彼得洛維奇同埋兩位國足徐雲龍同楊璞，就帶頭捐款。聽講北京重籌得二十萬人民幣，重將呢筆捐款送咗去北京市接受救災捐贈辦公室。
國內足球嘅負面新聞不嬲好多，家陣北京現代班職球員自發籌款幫忙對抗「沙士」，真係幫中國足球攞番唔少印象分。佢哋有呢份關心人嘅情操，真係好值得我哋香港同胞欣賞同埋學習。
西班牙國家隊教練沙斯因為不滿意維辛迪同艾比達玩失蹤，唔肯踢周中場國際友賽，決定喺未來一個月唔畀佢哋返國家隊練習；我求大俠認為沙斯咁做係多餘，事關西班牙喺五月份冇比賽，要到六月七號先同希臘踢歐洲國家盃外圍賽，沙斯嘅停賽令根本無實際作用。
都怪樹大招風，我哋《蘋果波經》嘅名家青蛙仔，貼波水準高街知巷聞，最近甚至有人混水摸魚，盜用「青蛙仔」個大名，去搞收費提供貼士網頁。我求大俠呼籲大家咪上當，要睇青蛙仔貼士，只要畀六蚊買份《蘋果》就得，唔使畀咩月費會費㗎。
以班霸嚟講，國米今季戰績同口碑都麻麻，雖然會長莫拉堤話會留用古柏，但意大利傳媒仍盛傳佢聞到魷魚香。國米王牌射手韋利近日都加入批評古柏，話佢戰術運用太保守；呢番話可謂將兩人嘅衝突公開化。古柏咁講紀律，韋利又要面，唔知兩個重可以共存幾耐呢？
南華嘅丘建威同陳志康日前退出港隊，隊友歐偉倫話預咗自己落選，但要澄清佢哋冇話唔願一日兩課操練；足總康大狀噚日即刻澄清，指港隊應付中日韓三強，講明狂谷體能，所以問幾個年過三十嘅功臣想唔想踢，踢就無任歡迎，但佢哋諗完都係唔踢。唉！我求大俠真唔明，既然足總想佢哋踢，點解重要問呢？真係好做唔做！
早兩日溜馬隊喺季後賽首圈落後一比三，記者問溜馬會長華殊點睇教練湯馬士嘅前景，華殊講到明就算球隊出局都唔會炒佢，第二日溜馬就立即追番一場。其實自湯馬士上任之後，溜馬有進步，輸波亦唔可以怪晒教練，睇嚟華殊好深明大義！
逢周一至周五見報