二人男子組合Shine後日就推出新碟《半熟成年》，佢哋兩個重特登喺兩個人嘅屋企拍攝，實行等歌迷可以登堂入室。
Shine自從兩年前一齊喺日本接受音樂訓練，過咗一輪同居生活，之後返嚟香港就開始各自生活。
Shine日前拍攝時諗番當年喺日本住間細屋，大家都冇錢使，相依為命嘅日子，突然好感慨，勾起好多回憶。導演要求佢哋拍大被同眠嘅鏡頭同喺攝製隊前傾心事，佢哋初頭好唔慣，但傾開又好似女仔咁雞啄唔斷。
此外，Shine前晚喺尖沙嘴出席一個歌唱比賽，俾人問到其勁敵Boy'Z推出寫真集，Shine話：「等我哋練大隻啲先。」徐天佑話着泳褲有得激凸就唔介意，而黃又南就話最緊要健康。
張震噚日出席LV喺台北新店開幕嘅宣傳活動，佢透露同鞏俐喺王家衞有份執導嘅新戲《EROS》入面有情慾戲，佢會有大膽裸露鏡頭，所以最近喺屋企頻頻健身同埋去曬燈，希望可以好弗咁拍呢場戲。張震又話拍攝期間經常同鞏俐約埋食飯同傾偈，以前以為鞏俐份人好有架子，但識咗之後覺得鞏俐其實好和善。
關心妍噚日去咗新城接受訪問，佢話嚟緊星期日會喺旺角一間唱片舖搞簽名會，但係近日非典型肺炎咁嚴重，問佢驚唔驚？佢話：「我會戴口罩同埋手套，咁到時都會派啲口罩畀歌迷，戴咗口罩嘅歌迷，就可以攞簽名，如果戴埋手套，就可以同我合照㖭！」
五十三歲嘅薛家燕（好姨），早幾日為擔任代言人嘅「好得」減肚產品拍廣告，佢當日要着件吊帶裙拍攝。好姨噚日喺電話度話：「我聽日（即今日）會出席呢個產品嘅宣傳，我覺得呢次可以減到個肚腩好開心，阿仔同囡囡一直好鼓勵同支持我減肥，佢哋見到我條腰瘦晒都戥我開心。」另外，好姨有份主演嘅無綫劇《皆大歡喜》時裝版會喺下星期一播，佢話：「對於新劇收視，我哋每位演員都好有信心。」
北京嘅非典型肺炎情況都相當嚴重，當地嘅市民都會戴口罩同手套，呢個病可以話喺北京造成一個恐慌。內地著名歌手郭峰有見及此，日前就作咗一首歌，佢希望憑歌寄意，激發各人要對國家有信心。早幾日郭峰重喺當地灌錄呢首歌，佢話咁樣先至可以同心合力打敗呢個病。
