一場「沙士」病毒累到唔少生意人叫苦連天，各行各業都受影響，就連老牌茶室陸羽都唔例外，索性聽日起將三樓閂門唔做生意。
噚日新地聯同幾間發展商就突然召開記者會，講將軍澳中心新優惠，由於事出突然，臨時臨急搵地方，要快兼就腳，就即刻諗起陸羽嘞。呢間茶樓平時好多城中富豪幫襯，食晏時段座無虛設，𠵱家市道咁差，食客少咗，先至可以騰出地方，畀發展商開記者會。
呢間出名水滾茶靚嘅茶室，室內裝潢古色古香，四間發展商嘅代表，包括恒基當勞張（張炳強）、新地周國賢、華懋武哥（吳崇武）同埋南豐麥一擎，都不自覺地被環境感染，扮起中國嘅四大才子，一齊坐低飲杯茶歎點心。雖然市道唔多好，難得四位依然談笑風生，且有問必答，一於做「順得人」。
非典型肺炎疫情仍未受控制，但世紀21如期舉行第一季季會，有百幾人出席。香港區域董事吳啟民主持開幕禮，佢話近日非典型肺炎新增個案有減少迹象，相信抑壓咗嘅購買力，會再度活躍。
佢哋請嚟紐約人壽行政營業總監曾昭鐸做嘉賓，講吓逆境求勝之道。會上重頒發咗十八個最高營業額同開單最多嘅獎項。
講開吳啟民，佢最近獲資本策略投資委任，做慶屋國際副主席兼執行董事。資本策略投資已正式收購咗慶屋國際。
零售業飽受非典型肺炎衝擊，商場大業主喺復活節假期大搞活動過後，仍繼續推出宣傳攻勢。和黃嘅紅磡黃埔新天地，聽日推出「母親節及父親節共嚐美食愛滿溢」美食優惠，幫趁八間指定食肆，可以低至半價享用套餐。
喺五月十、十一號同十七、十八號，和黃旗下商場就推「飛天小女警繽紛之旅」，好受小朋友歡迎嘅飛天小女警，會喺各商場現身。
另外，九龍倉嘅鑽石山荷里活廣場，喺五月八、十同十一號，舉行「健美全接觸」，安排一連串健康活動表演、消費情報同優惠。例如十同十一號，安排免費身體檢查，由註冊護士為顧客量血壓、測脂肪同血糖等。
樓價跌完再跌，呢幾年買樓，不論豪宅定係細價樓，𠵱家轉手，莫講話賺，唔蝕都偷笑。
不過，世事無絕對，啱啱易手嘅九龍塘金巴倫道二十四號地皮，竟然一年間升值百分之二十四，原業主賺五百幾萬。呢幅地只有五千呎，可建樓面約三千呎，成交價二千七百二十萬，呎價超過九千蚊，比去年四月以二千二百萬易手，升咗接近兩成半。
呢幅地之所以咁值錢，係因為同區大部份地皮動輒過萬呎，叫價至少四五千萬，反而咁細嘅地皮就好罕有，所謂貴得有道理。
中原地產青衣城高級分行經理麥成輝話，公司最近促成一單馬灣珀麗灣入伙以嚟最高呎租嘅成交。第三座呢個高層A單位，接近一千呎，月租萬三蚊，呎租十三個一。
租客原本住青衣區，經中記推介，兩個月睇咗區內近五十個租盤，都搵唔到啱心水單位，最後中記介紹個客睇珀麗灣，點知個客睇完就決定租用。
珀麗灣早前做咗個超平租成交，大部份放租單位，呎租全包都係十蚊左右，估唔到今次竟然有創新高成交出現。
蘭西
電郵地址：
