埋首研製轉子引擎超過30年嘅日本萬事得車廠，一直將呢種汽車高科技製成品，投放響旗下嘅RX-7跑車身上，並備受車迷追捧；而踏入21世紀，各地車迷期待已久嘅全新RX-8跑車，自車廠向外公布以來亦一直備受關注，雖然新車在港推出日期未定，惟廠方安排世界巡迴展嘅RX-8示樣車，繼泰國之後第2站會喺香港作首展，並剛於日前抵埗，一眾Fans不如嚟先睹為快啦！
記者、部份攝影：陳偉林
抵埗作預展嘅RX-8，屬頂級版Type-S型號，撇除性能不提，單係整個座艙布置，以紅色作主調嘅設計，加上銀白電鍍框邊嘅修飾，既能烘托出一份跑車辛辣感，重予人有前衞High-tech嘅味道。再者，兩排空間亦見闊落舒適，除前門電窗、門邊電鏡外，重有原廠高級音響同恒溫冷氣，當然唔少得重有前排四個安全氣袋組合啦！
呢一代全新萬事得RX-8，之所以咁受注目，皆因佢全新概念設計，摒棄咗原有單一跑車路線，改而走高性能房跑車路線，既有與別不同嘅左右開揭式車門，兼且重係兩排獨立四座位布局，響同一時間既解決雙門跑車上落嘅麻煩，兼且多加兩個座席，重有多一層實際體驗㗎！再者，四輪突出嘅拋沙板設計，匹配響四輪加大碼18吋合金胎軨，配襯響高聚焦Xenon頭燈同一體化嘅鬼面罩跟氣霸組合，單係外觀經已教人有平易近人嘅親切感呢！
新款RX-8用上一台全新Renesis（RotaryGenesis）雙轉子引擎裝置，除性能輸出驚人之餘，車重分布亦見平均，加埋前輪高剛性嘅鋁合金雙搖臂，匹配埋Racing化嘅偏硬吸震筒組合，還有較一般粗硬嘅前後防傾桿配搭，行車予人穩紮踏實外，主動式嘅電子DSC、ASC，重有限滑差速器（LSD），以及四輪ABS連EBD裝置，重大有可靠同收放自如感㗎！
後話
呢部作世界巡迴展嘅萬事得RX-8示樣車，只會逗留香港十日；由5月1日至5月10日，會響葵涌萬事得汽車中心作預展，至於正式登陸香港嘅時間，大概會係今年九月左右，而且配額極之有限，若你想先睹為快，又或者想快人一步擁有的話，就記得屆時去睇睇同落定喇！
引擎：654cc×2轉子
馬力：250ps/8500rpm
扭力：22.0kgm/5500rpm
傳動：6前速手波，後輪驅動
懸掛：（前）雙搖臂（後）多連桿
制動：（前）透氣碟（後）透氣碟（ABS）
輪胎：225/45R18BridgestonePotenzaRE040
尺碼：4435×1770×1340mm
軸距：2700mm；車重：1310kg
0-100公里：6.8秒；極速：250km/h
新車售價：約港幣40萬
查詢：萬事得香港（24813363）