小學同幼稚園繼續無限期停課，陳家細佬妹被迫要留響屋企繼續發呆，一向坐唔定的細佬終於忍唔住大叫：「我要做特務！」扮起特務戇J來，確實又趣致非常。媽媽於是靈機一觸，索性響屋企打Wargame，一來可以止到爸爸的Wargame癮，二來全家當做運動強身健體，當然又可以畀個機會細佬大過威武特務癮！
記者：招佩珊 攝影：伍慶泉
ImageFamily：陳氏家族
泳鏡加枕頭夠保護
一講到玩，細佬就最耍家，打Wargame當然要做足安全措施，拿拿臨入房拎出幾件法寶，原來細佬將泳鏡當眼罩，枕頭變成防彈衣。睇細佬一身打扮，比戇J更騎呢。媽媽則為細妹戴上頭盔，皆因擔心這個儍丫頭玩起來亂碰亂撞，玩到「嵌」頭埋牆。
武器安全至上
至於武器，一切安全至上，細佬的是射出膠波的玩具槍。其實，媽媽一早買了以膠波、海綿飛環作為子彈的玩具槍給囝囝囡囡，而爸爸用的機關槍，子彈頭都是塑膠做的吸盤，就算被射中都唔怕弄傷，絕對玩得安全。家姐就揀了支射出吸盤仔的迷彩槍。
第一戰場
陣地優點：有浴簾作掩護。
剛剛才綁好個大肚「Dump」，細佬便急不及待通屋四圍「騰」，當然係要立即開戰！他第一時間尋找最佳陣地，沒想到心目中的最佳陣地──浴室，竟被細妹捷足先登，惟有先來一場攻防戰。單槍匹馬唔夠打，聯袂家姐一齊進攻就實會贏，兩支長槍對準細妹「篤」完再「篤」，不費一粒彈藥就已佔了上風，細妹果然投降，第一戰勝！
戰果：細妹始終不敵，被迫投降！
第二戰場
陣地優點：透過門上的一小塊玻璃睇到敵人，但敵人卻不會發覺。
打低細妹，兩姐弟就由戰友變敵人，充份體現戰場法則。家姐隨即飛奔返回她的據點廚房門後，她的武器威力實在好強，起碼支槍的尺寸大過細佬所用的，射出的吸盤一支又一支打到細佬身上，呢一戰細佬慘敗，無法攻佔家姐的據點，只好退守自己唯一霸佔的床下底。
戰果：細佬進攻失敗，退守床底。
第三戰場
陣地優點：夠大，成個人都匿得。
呢個時候，家姐同細妹已匿在書枱底合謀要打低扮晒戇J的細佬，首先由細妹進攻，細佬因為匿在床底而難以反擊，惟有逃到大廳。中計！原來家姐已一早在大廳守候，兩姐妹一於來個前後夾攻，呢個家居戇J終於戰敗在地氈上！
戰果：細佬棄守陣地，同姐妹二人硬拼，又一次大敗。
第四戰場
陣地優點：挑戰父母，有滿足感！
身為家居戇J的細佬輸了當然唔忿氣，為了要贏番一場，惟有同家姐細妹結盟攻打陳氏重地──主人房，乘機可以拿部被沒收的GBA偷玩一陣。大數三聲便齊齊攻入房，誰知爸爸躲在房門後，媽媽更藏身於衣櫃內，三姐弟中伏撤退。
戰果：3個小鬼一心合力要打敗爸爸媽媽，卻遭到埋伏，認真失敗。
最後決戰
陣地優點：埋身肉搏，最痛快！
三姐弟退守大廳，爸媽就當然乘勝追擊，一家五口最後在大廳來一次最後決戰，父母子女分別在梳化的兩頭各據一方，「炮火」相當猛烈，誰勝誰負？這個時候已經不再重要，最重要是全家玩得過癮！最開心當然是家居戇J！
店舖資料
（a） 隆記文具紙行（23869124）
地址：深水埗桂林街38D地下
（b） 金輝玩具（23903337）
地址：旺角弼街73號地下
（c） 玩具反斗城（28811728）
地址：銅鑼灣皇室大廈3樓