麗新發展（488）私有化豐德麗（571）的計劃，將於今日舉行股東會投票。
經紀陳話，睇怕今次都係瓜多過菜，成事機會唔慌高。其實淨係睇股價，唔使睇其他消息，已經知道市場對呢個計劃嘅反應。大市噚日勁升309點，但豐德麗被一手8000股質低9.8%，收0.23元。私有化作價每股0.28元，但咁都冇人吼，可知私有化計劃成功機會唔慌高。
究竟點解麗展私有化豐德麗咁困難？獨立財務顧問話，私有化作價比豐德麗資產淨值有九成折讓，所以勸股東唔好制，而麗展就表明唔加價。在股票市場中，呢啲嘢通常唔會有意外，估計係在最後關頭講唔掂數。
至於豐德麗邊位神秘股東唔happy私有化？經紀陳則話好易睇，只要睇吓呢系公司以往同乜嘢人做好朋友，就估到係乜水。
另外，由於大市噚日勁升，好多二三線股仔亦見熱身，其中上海策略置地（164）成交突增，股價急升7.45%，收0.173元，收復之前大量失地，似乎有所圖謀。
慕容小初