英國著名音樂人DamonAlbarn搞完虛擬組合Gorillaz之後，又要再次為佢隊樂隊Blur下月頭推出嘅新碟《ThinkTank》忙碌，打頭陣新歌《OutOfTime》喺本地走勢非常強勁，成為上星期二至噚日全港電台外語歌播放率No.1，打低麥當娜（Madonna）嘅反戰歌《AmericanLife》！
好關心世界大事嘅Damon，早排喺倫敦參加反戰示威，佢非常不滿美國對伊拉克開戰，所以索性將《OutOfTime》嘅MV拍成反戰短片，雖然MV充滿反戰色彩，但大家千祈唔好以為內容係大賣飛機大炮同血腥暴力，今次攝影隊特別登上一艘戰艦，以紀錄片手法拍低軍人嘅生活，經常留意住戰事發展嘅士兵，真係食唔安又瞓唔着，重有士兵匿埋一角求神拜佛，希望保住性命。
而MV嘅主題就圍繞一個女兵喺開戰期間嘅生活，大家會睇到佢木無表情咁起身梳洗，跟住換上戰衣，最後企喺戰機跑道旁邊，面對茫茫大海上，配合Blur呢首憂傷慢歌，嗰份慘情真係令我羅拉有啲心酸。