很替明星辛苦，鏡頭前，縱然不想笑，也得笑，因為懂笑，是專業。
關心妍是明星，笑得很專業，但她的笑絕對發自內心，不用強顏，也懂歡笑。
知道本欄叫《好彩香港有佢哋》，問她有何鼓勵港人的說話，她搖搖頭。
是笑着搖頭，兼笑着說：「我唔識點鼓勵人喎，不如笑啦，笑多啲就唔會咁愁喇。」
經濟不景、肺炎肆虐、失業裁員……每天盡是這些令人洩氣的消息，翻翻報紙，準令你笑不出，關心妍自認是小人物：「我呢類升斗市民，諗唔到可以做乜，根本亦唔到我哋去諗，等喇，有危就有機嘛！」等，等運到，說到尾即是聽天由命，是無可奈何。「問題係你用乜嘢心態去面對囉！笑又係無可奈何，唔笑又係無可奈何，我就揀笑喇。」
每天起床，伸個懶腰，她就帶着心愛小狗，落街散步，散步完就跑步，是用盡全身氣力的跑，跑到筋疲力竭為止，「Work㗎！我跑步嗰陣，會望住條路全心全意咁衝刺，又或者同隻狗鬥快跑，人做緊劇烈運動，個腦會一片空白，乜都唔使諗，乜煩惱嘢暫時都可以拋諸腦後。」
關心妍說了這句話：「我份人好簡單，乜嘢都可以笑一餐。」她倒沒說謊。
着她在畫紙上寫鼓勵說話，她想也不想，就寫：「KeepSmile！笑多啲！」簡單得不能再簡單，記者忍不住揶揄：「嘩！乜你寫啲嘢咁行？」「咩呀！心底話嘛！」
記者不經意說了句真心話：「你真人比上鏡靚十倍！」聲如蚊蚋，難得她聽得到，「係呀！好多人都咁話我，我真人靚好多，哈哈……」之後笑足十秒。
或許關心妍說得對，笑，未必能解決問題，但哭喪着臉也於事無補。刻下的你和我，笑多點，在不快樂中找快樂，相信這一關，也一樣地過。
記者、攝影：陳漢榮