非典型肺炎肆虐全港，Twins近日接受最新一期《JET》月刊訪問時，便以一身運動裝束示人，她們除了落力宣揚做運動抗炎的訊息外，更大談做運動與均衡飲食的好處。
人氣組合Twins日前接受《JET》月刊訪問時，以一身網球裝示人，藉以帶出多做運動對健康的好處，不過兩人卻表示本身絕非球類運動的愛好者，蔡卓妍（阿Sa）說︰「我打網球永遠只係執波。運動方面我只係學過芭蕾舞同跳高跳遠，三歲就開始學芭蕾舞，一學就十年。讀到中一就開始轉玩田徑，可惜到後期因練習過度，扭傷韌帶，背部肌肉成日痠痛，於是就決定退出，𠵱家肌肉有時都會隱隱作痛。」
鍾欣桐（阿嬌）則說︰「我喺中學期間加入咗田徑校隊，強項係好少人玩嘅一百米跨欄，我足足受訓咗五至六年時間，最好嘅一次成績係得到學界亞軍。曾經有段時間都鍾意玩體操，一字馬、側手翻咁，重一學就識，但媽咪反對，結果不了了之。」
當紅的Twins工作接踵不斷，睡眠對她們來說是奢侈品，這樣一來，她們的身體日漸虛弱，阿Sa說︰「𠵱家真係好少專登去做運動。而為咗健康，有人會盡量唔食零食或煎炸食物，但我覺得只要肯運動，食少少都冇壞，以前做完運動都會第一時間飲汽水食Pizza，但我最介意係食多咗就肥喺塊面度，『Pizza面』係我長期作戰嘅敵人。」
阿嬌亦說︰「自從入咗行後運動量大減，睡眠不足，大風少少都會傷風感冒，𠵱家只能做到嘅係注意飲食。燕窩、柚子茶係我近期至愛，對皮膚好，又可以防止喉嚨痛，對抗炎有幫助。」
此外，對於不能赴法國拍攝寫真集，而要留港拍攝，Twins昨日在港台接受訪問說：「本來想順道去歐遊，好彩都未訂機票，都冇損失。」