上海號稱「安樂土」，不少內地大款紛紛走去上海逃避「沙士」，不過上海人自己都唔係幾信，北京已經爆煲，上海還會遠嗎？賓架L細佬早已移民上海，快活咗好幾年，兩個禮拜前打電話落嚟問候賓架L：「香港點呀，你好嗎？」賓架L反問佢上海點，佢話：「都重算係平靜，不過新天地過往人頭湧湧，而今水盡鵝飛，唔知點解呢？」
梗係上海市民信自己隻腳多過信政府消息啦。餐廳羅一位老友X聽聞新天地間餐廳生意大跌，急忙走上去視察，港龍上海班機以前可以講係一票難求，但嗰日就全機得三位乘客，安全到極。老友X到新天地一睇，見到真係慘過香，急急度橋救亡，你知啦，新天地啲租金並不便宜㗎。老友X話：「如果重有人講上海冇沙士作怪，不如信伊拉克新聞部長沙哈夫。」
餐廳羅啲同業，紛紛向業主訴苦，要求減租，而業主直到目前為止，一於詐聾詐盲，聽唔到，睇唔見，一味係咁拖，耍太極。既然如此，好多餐廳捱唔過五月，會陸續拉閘閂門。最高檔、最貴嘅陸羽都要將三樓暫停（五月一日起），其他酒家茶樓餐廳捱得幾辛苦，可想而知。問餐廳羅：「你會唔會向政府基金借錢出糧畀夥計？」餐廳羅話：「要股東擔保喎，啲股東邊會肯制，點借？」況且三個月之後，點知有冇生意，如果冇前景，𠵱家借錢嚟做乜？所言甚是，真係肯去借錢嘅，心口要寫個勇字，值得尊敬。