特首董建華本來難得有機會主持吓啲同SARS無關嘅公開活動，點知俾總理溫家寶急召去曼谷開會，佢惟有同法國朋友講聲對唔住，改派煲呔曾蔭權做噚日「拿破崙大展」開幕禮嘅主禮嘉賓。
呢個喺香港歷史博物館舉行嘅展覽其實好有來頭，展出嘅二百件珍品都係由法國瑪爾梅莊同普雷歐林堡博物館借出，真係值得一睇，話晒拿破崙都係一位曾經顯赫一時嘅英雄人物，而且重可以睇到佢雙親嘅雕塑，以及佢同紅顏知己約瑟芬嘅加冕情況。
老董去唔到，八方覺得最可惜嘅係佢冇睇到一幅叫做「拿破崙巡視雅法災區」嘅油畫。呢幅畫所繪畫嘅係一七九九年法國軍隊攻打敍利亞嘅雅法，軍隊不幸遇上疫症蔓延，拿破崙親自去到疫區醫院攙扶住一個身上長滿膿瘡嘅傷兵，呢個場景實在值得董生夫婦好好學習。
負責講解嘅香港歷史博物館館長丁新豹話，拿破崙最擅長塑造自己形象，又好叻激勵士氣。呢啲肯定係老董弱項。
拿破崙嘅故事說不完，丁館長話佢其實姓Bonaparte，但係因為被封為王咁威水，於是佢嘅後人一於以Napoleon為姓。
如果唔係遇上SARS，法國館長冇嚟到，就重多古仔聽。
傳真︰2623-9278
電郵︰