很多在太古城工作的城市人，到鯉景灣太康街西餐食肆食晏已經成為他們的首選，貪佢鄰近海邊，空氣好，又近寫字樓。最近呢度又有一間食肆開張，既是西餐廳、下午茶座，又是夜晚蒲吧睇波嘅聚腳地。
記者：黃思濃 攝影：陳陶鈞、黃思濃
周老闆Michael和Jamice兩兄妹，一個鍾意蒲吧，一個鍾意廚藝，兄妹二人好耐以前就想各自創業，後來發現鯉景灣尚有一舖位，就決意租下，當裝修妥當，預備創一番大事業之際，恰巧遇上「沙士」肆虐，正在苦思於何時開業的時候，突然又露出一線曙光。
原來西餐店最後的裝修工作是安裝大型電視螢幕，那晚剛剛有英超聯足球賽事轉播，店外竟然有大批人圍觀，他們都異口同聲問正在忙錄工作中的周氏兄妹，「可唔可以入嚟買杯嘢飲睇場波呀？」Michael和Jamice心想，擇日不如撞日，就於那晚上便匆匆開舖，並連續幾晚都出乎意料地爆場，兩兄妹就這樣有了個好開始。
採訪當日，駐足門口未看到兩兄妹時，個靚女侍應已經好禮貌咁話：「如果唔介意，等一陣就有位㗎啦！」直至周氏兄妹出來，便開始介紹西餐菜譜。
Jamice話：「我哋舖頭廚房唔大，每日只會提供兩三款西餐，每兩日改一次，好彩都有一定客人，而且至今日日爆棚！開業以來，一路旺……其實當中會有三種『產品』我好執着，都係自己下廚，例如華道夫沙律、芒果布甸同Dido'sBlend咖啡。」
「如果啲白領顧客要求飽肚嘅，我哋有意粉，如果要求瘦身嘅，我哋有沙律，而且唔講唔知，我哋門口擺啲花好好賣，好多時客人食完晏就會買一束帶走送畀女朋友。」
除了以上推介，一定要試試鎮店咖啡Dido'sBlend，為了這款意大利咖啡，Jamice特別用上由泰國親自買回來的玻璃咖啡杯，這杯咖啡最特別之處就是面層的泡沫油，把新鮮的咖啡濃香暫時「蓋」着，飲用時只須將泡沫潑開，其香味便會綻放出來。Jamice話唔用白瓷杯改用玻璃杯，目的是希望給客人看到咖啡嘅層次。原來好似小記一樣，吃完華道夫沙律後再呷一杯Dido'sBlend，確係滿足。
夾雜朱古力味
飲呢杯咖啡竟然會聞到一陣朱古力味，原來咖啡豆本來就有朱古力味，好似炭燒Mocha咁，喺台灣，呢類意大利咖啡好流行，如果加多一件綠茶餅就加$5。
果香藏於琥珀中
剛呷一口飛砂走奶嘅Dido'sBlend咖啡，再食一匙芒果布甸，喺咁熱嘅夏天，確實冰涼爽口。布甸晶瑩剔透，好似松脂琥珀咁靚，慢慢食到底層係一塊塊熟到透，果香四溢嘅新鮮芒果。如果加埋紅肉西柚汁、芒果汁或橙汁都係$22。
清新熱量低
呢味沙律係由雞肉、松子、合桃、蘋果、生菜等煮成，係追求瘦身嘅女士最鍾意嘅午餐，呢款沙律注重刀章，每樣材料堆砌時，要有先後次序之分以及固定嘅形狀。撕成一片片嘅雞肉加香草煮熟，切到好似火柴枝一樣嘅蘋果及甜爽生菜，口感清新熱量低。
芡汁好開胃
呢味健康菜餚，口感清新，芡汁開胃，用上甜辣椒、香草、番茄一齊燴，三隻游水中蝦夠晒鮮甜，加埋周打魚湯、咖啡或茶，小記試了一個已經好滿足！
我鍾意呢間餐廳因為近海，空氣清新啲，咪叫個仔揸車一齊嚟呢度食飯囉！
電話：25359979
地址：鯉景灣太康街45號GB12