昨日唔止港股大反彈，連港府聲望都出現反彈。港府用包機接載因肺炎疑雲滯台的香港旅行團回港，算係急民之所急，值得一讚，相信亦會贏回不少民心。中港台面對肺炎疫症的態度，台灣人的反應，部份有歇斯底里的情況，難怪世衞怕台灣疫情會失控。
港府被人讚近期少有，港股單日大升逾300點亦好耐未見過，恒指在期指結算日大升309點，收8744，成交105.82億元，亦係去年7月以來最高。
美股周一晚大升，相信只係順水推舟，唔係昨日港股大升最主要原因，其實杜指仍在平頂三角形內運行，尚未出現突破。前日港股應跌未跌，好友已露反撲手影，只係想不到好友真能在關鍵時刻，使出雷霆一擊力挽狂瀾，在4月收市前將恒指抽回8640之上，令恒指月線圖重返去年9月至今長期支持軌之上收市，對穩定投資者信心起相當大作用，看來無形之手確是無處不在。
恒指短期相信反彈未完，若肺炎新症持續趨降，恒指有力再試50日線（現處8907）及平行下降通道頂9000水平，至於能否升破，則要看SARS會否向香港說後會無期。
短期策略，恒指未升穿平行通道頂前，趙飛雲仍睇淡，以8640作為好淡分水嶺，跌穿8640，先買1注恒指Put輪；補回昨日上升裂口8577至8453，在8450附近買第2注；跌穿小雙底8330買第3注。
趙飛雲