特首董建華噚晚漏夜飛去曼谷，陪總理溫家寶出席東盟──中國領袖特別會議，傾點樣防治SARS，又點可以冇咗經驗最豐富嘅香港特別行政區SAR份呢？
老董經過兩日休養生息，加上新感染個案有下降趨勢，所以個人都醒番啲，雖然記性都係麻麻哋，間中仍會忘記人哋問乜。
有消息話，老董喺沙士爆發後亂晒陣腳，請教紐約前市長朱利亞尼應該點做，跟住就日日自己出嚟報告疫情，但佢學啲唔學啲，好似人哋成立「九一一受害者賠償基金」畀死者家屬申請，香港就欠奉。講真，其實好多人都死得好寃枉，家屬唔知使唔使去申訴專員申寃，政府冇理由當一般意外身亡處理。
八方知道社會福利署林鄭月娥署長一直有跟進受害家庭，幫孤兒寡婦。但係北京都懂得發動全民捐贈防炎，特區政府點解唔做呢？好似八方噚日提咗一句，話放棄三千蚊退稅，捐畀被沙士搞到家破人亡嘅家庭，都立即有熱腸讀者和應，問可否通知稅務局，將退稅直接送畀有需要人士，無謂浪費稅局人力物力寄支票。
唔知稅務局局長劉麥懿明可否幫幫忙，畀張表格我哋填？今次總退稅款項達二十三億，有一個巴仙已經可以解許多家庭之困了。
傳真︰2623-9278
電郵︰