谷家四口近日因「沙士」襲港搞到情緒低落，又驚染病又怕經濟唔好冇工做，谷太有感家中氣氛沉悶，心諗不如改改風水轉運，就請來玄學家麥玲玲上門一看究竟。一到埗，玲玲就話：「家中雜物太多喇！財來財去囉！」谷太立刻將責任推卸：「老公囉，所有嘢都要留低，電腦無咗又要番張電腦枱！」谷生一聽立即反駁：「唔知邊個買到通屋係鞋呢？」看見兩口子爭吵，玲玲一笑：「好小問題啫，只要郁兩郁，咁就乜問題都冇！」
記者：梁佩芬 攝影：陳盛臣
Model：谷氏家庭、芝君
有唔妥：門前紅色招病魔
谷家門前的過期風水擺設累事。
轉運大法
最近谷家所住的大廈有人中招而登疫廈榜，搞到谷家上下好擔心，最想問怎樣才可擋住病魔。看過家中各人時辰八字後，玲玲覺得門口不宜放紅色物品，尤其紅地氈及揮春，再不立即改正，就難保病魔不會來襲。谷太卻問：「上年有人話，屋企坐西北宜放紅地氈，所以就放到今年。」玲玲解釋：「呢啲都係上年嘅事啦，放到今年，唔得啦，況且亦都要配合屋中人的八字。」玲玲話紅色今年招病魔，轉放淺色地氈，如白、灰等色會較好，更重要的是在地氈底放六個銅錢，這樣就能保全家身體健康。
有唔妥：睡近門口損健康
仔仔床頭太貼近門口，是損害健康的元兇。
轉運大法
抗完外憂，又要化解內患。谷家仔仔俊俊一向有呼吸系統毛病，疫症同呼吸道有關，谷太就特別擔心：「係呀，佢有哮喘，又成日喉嚨痛！」玲玲入房一看：「床頭位置唔好，喺門口旁邊，咁會影響健康！」谷生大叫：「咁咪要搬過張床囉，咁煩？」原來只需將平時睡覺的位置前後對調，就可以化解身體毛病，谷生還以為要大興土木。「咁容易就得，俊俊，快啲搬過晒啲枕頭被鋪！」醒目的俊仔，唔使兩秒就搞掂！
有唔妥：雜物多擋財氣
家中地方狹小，雜物又多，加上梳化位擺放錯誤，搞到谷家財運麻麻。
轉運大法
確保健健康康，就要諗計搏殺搵錢，如今經濟差，谷家一向繃繃緊，真係要諗諗計。玲玲話，組合式電視機櫃可免則免，因為上面放的雜物太多會阻隔財氣，最好換個矮身櫃。谷太一聽要買家具，眉頭一皺，幸好師傅教路：「換家具可以遲啲先，首先搬過張梳化，離開啲門口，都可以頂住先！」二話不說，大女芝君已經準備好，幫媽媽一起推梳化！
面對困境，人嘅心情都自然煩躁啲，谷生谷太近來就經常都為小事爭執，雖則話兩公婆嗌嗌交本可視作生活情趣，但少不免傷害感情。原來擺擺風水陣，都可以令一家人和和氣氣。玲玲就吩咐他倆：「紅色不宜放門口，但放入睡房功效就唔同，放件紅色東西喺床頭位置就可令夫妻減少衝突，小飾物又得，咕𠱸都得。」
在這經濟低迷時期，谷生事業雖一帆風順，都難免有點擔憂！幸好玲玲話：「唔使驚，你事業運都唔錯，想安心啲，可以放四支富貴竹喺正東位，不過記得日日換水，謝咗就大吉利是囉！」依計行事！
麥玲玲雖然幫了谷家睇風水，但每家的問題也不相同，所以她介紹了幾招簡易風水擺設法，有助所有家庭於這逆境中轉轉運，兼可美化家居。
說到底，健康才是無價寶，家中有兩個位置都能驅趕病魔突襲，一是在東南位放一個白色玉葫蘆，二是在正北放一些金色重身物品。
咁嘅時勢，多個錢傍身都安心啲，而羊年財位在家中西北位，我們可以選擇放金魚或水種鮮花，可避免財來財去，啲錢都緊貼你身邊。
疫症不但影響經濟，更搞到學校停課，仔仔女女的功課都受影響，而文昌位主事業及學業，一定要在這裏「落重藥」。在西南位放九個紅色的利是封就可以，記得利是封要平放，不要捲曲或摺成其他形狀。