經紀陳月中品題過嘅中意控股(1198),終於如期在噚日公布業績,一如佢所料,業績非常靚,全年盈利上升37%,有成4451.4萬元,但最正係派末期息8仙。
小初同經紀陳講,對中意唔係太有信心,自從佢品題之後,股價並無太大異動,大部份時間在1元水平附近徘徊。噚日公布盈利大升好消息後,股價亦只係升咗4.9%,收1.07元,成交唔夠200萬元,唔算太標青。
經紀陳反駁,佢反問小初,家陣係乜嘢環境,作為二三線股,股價企住唔跌已經好叻,況且家陣股價同惠理基金入股價1.05元差唔多,派高息更係留住芬佬嘅招數。噚日幕後掛出買盤,搭好成個棚,表現亦算有誠意。公司方面,更搵埋大美人關芝琳做家具代言人,人地搞咁多嘢,佢問小初重想點?
小初唔敢質疑人哋嘅誠意,只係家陣股仔炒賣氣氛薄弱,最怕中意又係好消息當壞消息炒,所以有啲戒心。
慕容小初