張栢芝的感情生活認真複雜，近日有雜誌報道她跟舊愛陳曉東在西隧附近發生輕微撞車，還指栢芝「翻𠝹」東東，而東東的經理人羅嘉慧則表示東東和栢芝絕對再見亦是朋友，二人平時都有聯絡吃飯。
近日有雜誌報道張栢芝本月十一日與舊愛陳曉東在西隧附近發生輕微撞車事件，二人遂被傳舊情復熾。對於栢芝被指「翻𠝹」舊愛東東，東東的經理人羅嘉慧昨在電話中說：「無聊，佢哋唔係復合。食飯、飲嘢好正常，平時佢哋都有聯絡。東東唔希望用啲咁曖昧嘅字眼嚟形容佢哋，做唔到情侶都可以做朋友。至於撞車事件，就要問番作者同畫家，每次寫成咁都打電話嚟問番，我哋感到好攰。」
栢芝的經理人李小姐則在電話中說：「呢單係笑料一則，講多無謂，本雜誌連圖都可以畫埋出嚟，栢芝都覺得冇說話好講。」
而栢芝和任賢齊早前拍攝的新片《絕種好男人》，將於後天在香港上映，至於內地則因非典型肺炎疫情，會押後映期。栢芝和小齊在片中扮演情侶，有不少親熱戲份。在宣傳照中，栢芝更瞓在雙手被綁的小齊大髀上。
栢芝在片中亦會穿上校服裙，她說：「我八年冇着過校服，着番拍戲都好開心，覺得好有校園感覺，可惜𠵱家好少跟中學同學聯絡。」
問栢芝覺得世上可有好男人，她說：「世上重有好男人，但我就未遇到，希望在明天，呢啲要等上天安排。」而內地亦有消息指正在上海拍攝電影《飛鷹女俠》的小齊，因受疫情影響，短期內都不回台灣。
採訪：蔡如玉、陳梅香
